အမေရိကန် ဒီမိုကရေစီ၊ လူ့အခွင့်အရေးနှင့် အလုပ်သမားရေးရာ လက်ထောက်နိုင်ငံခြားရေးဝန်ကြီး တွမ်မယ်လင်နောစကီးသည် ဇန်နဝါရီ ၁၇ရက် မှ ၂၁ရက်ထိ ငါးရက်တာ မြန်မာနိုင်ငံသို့ ရောက်ရှိနေပြီ ဖြစ်သည်။
၎င်း၏ ခရီးစဉ်အတွင်း မြန်မာနိုင်ငံအစိုးရအဖွဲ့ တာဝန်ရှိ ပုဂ္ဂိုလ်များနှင့် တွေ့ဆုံရန် ရှိနေပြီး လက်ရှိ မြန်မာနိုင်ငံတွင်း ဖြစ်ပေါ်နေသည့် အလုပ်သမားအရေးပြဿနာများနှင့် ပတ်သက်ပြီး အရပ်ဘက်အဖွဲ့အစည်းများ၏ အသံကို နားထောင်ရန် ရှိနေသည်။
ယင်းအပြင် ရန်ကုန်မြို့လယ်ရှိ ခန်းမတစ်ခုတွင် လူထုနှင့် တွေ့ဆုံပြီး ဆွေးနွေးပွဲတစ်ခုကျင်းပမည်ဟုလည်း အမေရိကန်သံရုံးက ထုတ်ပြန်ထားသည်။
"သူ့ခရီးစဉ်က မြန်မာ့ဒီမိုကရက်တစ်ဖြစ်စဉ်အပေါ်ထားရှိသော အမေရိကန်အစိုးရ၏ ကတိကဝတ်ကို ထုတ်ဖော်ပြသလိမ့်မည်ဖြစ်ပြီး၊ မြန်မာပြည်သူလူထု၏လိုအပ်ချက်များနှင့်အညီ အသစ်ရွေးကောက်ထားသည့် အစိုးရသစ် ချော့မွေ့စွာကူးပြောင်းရေးက အရေးကြီးကြောင်းကို အားဖြည့်ထောက်ကူပြောကြားသွားပါမည်။"ဟု အမေရိကန်သံရုံးက ထုတ်ပြန်ထားသည်။
တွမ်မယ်လင်နောစကီးသည် ဒီမိုကရေစီ၊ လူ့အခွင့်အရေးနှင့်အလုပ်သမားရေးရာ လက်ထောက်နိုင်ငံခြားရေးဝန်ကြီးအဖြစ် ၂၀၁၄ ခုနှစ်၊ ဧပြီလက စတင်တာဝန်ထမ်းဆောင်ခဲ့သည်။ ယင်းမတိုင်မီ
လူ့အခွင့်အရေးကာကွယ်စောင့်ရှောက်ရေးကို တစိုက်မတ်မတ်ဆောင်ရွက်လျက်ရှိသော ဝါရှင်တန်အခြေစိုက် လူ့အခွင့်အရေးစောင့်ကြည့်ရေးအဖွဲ့တွင် ညွှန်ကြားရေးမှူးအဖြစ် တာဝန်ထမ်းဆောင်ခဲ့သည်။
