ဖေဖော်ဝါရီ ၂၀
ချင်းပြည်နယ်တွင် ယနေ့ ဖေဖော်ဝါရီ ၂၀ရက်နေ့ တွင်ကျရောက်သည့် ၇၄ ကြိမ်မြောက် ချင်းအမျိုးသားနေ့အခမ်းအနားကို သက်ဆိုင်ရာမြို့နယ်အလိုက်ထွေအုပ်ရုံးများတွင်သာ အနည်းအကျဉ်းကျင်းပနိုင်ခဲ့ကြကြောင်း သိရသည်။
နှစ်စဉ်နှစ်တိုင်းစည်းကားစွာကျင်းပနိုင်ခဲ့ သော်လည်း စစ်ကောင်စီအာဏာသိမ်းပြီးနောက်ပိုင်း ယခုနှစ်တွင် ယင်းကဲ့သို့ကျင်းပကြခြင်းဖြစ်သည်။
အဆိုပါချင်းအမျိုးသားနေ့အခမ်းအနားကျင်းပနိုင်ရန်အတွက်လည်း ပြည်နယ်စစ်ကောင်စီမှ တစ်မြို့နယ် ၁၅သိန်းနှင့် ခရိုင်တစ်ခုလျှင် သိန်း၂၀ စီထောက်ပံ့ပေးထားကြောင်းလည်းသိရသည်။
"စစ်ကောင်စီမှဦးစီးကျင်းပသည့် ချင်းအမျိုးသားနေ့အခမ်းအနားများတွင်ပြည်သူများပါဝင်ခြင်းမပြုကြရန်နှင့် မနက် ၁၀နာရီမှ ညနေ ၄နာရီအထိ တိတ်ဆိတ်ငြိမ်သက်ခြင်းသပိတ်ပြုလုပ်ကြရန်" ကြားကာလ ဟားခါးမြို့နယ် ပြည်သူ့အုပ်ချုပ်ရေးအဖွဲ့ကလည်း ကြေညာချက်ထုတ်ပြန်ထားသည်။
ထို့အပြင် မင်းတပ်မြို့နယ်များနှင့် မတူပီမြို့နယ် ပြည်သူ့အုပ်ချုပ်ရေးအဖွဲ့များမှလည်း'' အာဏာသိမ်းစစ်ကောင်စီကျင်းပမည့် (၇၄)နှစ်မြောက် ချင်းအမျိုးသားနေ့တွင် ပြည်သူများအနေနဲ့ ပူးပေါင်းပါ၀င်ခြင်း လုံး၀မပြုကြရန်”အသီးသီးထုတ်ပြန်ထားသည်။
ချင်းအမျိုးသားနေ့ကို ၁၉၅၁ခုနှစ်မှစ၍ နှစ်စဉ် ကျင်းပလာခဲ့ကြသည်မှာ ၂၀၂၂ခုနှစ်တွင် (၇၄) ကြိမ်မြောက်ရှိခဲ့ပြီဖြစ်သည်။
ချင်းအမျိုးသားနေ့သည် ချင်းလူမျိုးများ၏ သူ့ကျွန်မခံလိုသည့်စိတ်ဓာတ်၊နယ်ချဲ့ဆန့်ကျင်ရေးစိတ်ဓာတ်၊ အမျိုးသားရေးစိတ်ဓာတ်နှင့် လူထုဆန္ဒအရ ဒီမိုကရေစီ စနစ်ဖြင့် အုပ်ချုပ်သည့် စနစ်ကိုမြတ်နိုးသည့်စိတ်ဓာတ်တို့အပေါ်အခြေခံ၍ ပေါက်ဖွားလာခဲ့ခြင်းဖြစ်သည်။
