ဖေဖော်ဝါရီလ ၁၄ ရက်
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် သုံးဦးကို ပုဒ်မ ၁၃၀-ကဖြင့် စွဲဆိုထားသည့် အမှုမှ တရားလိုဖြစ်သူကို ယနေ့ဖေဖော်ဝါရီ ၁၄ ရုံးချိန်းတွင် စစ်ဆေးခဲ့ကြောင်း တရားရုံးနှင့် နီးစပ်သူထံမှ သိရသည်။
ပြီးခဲ့သည့် ၂၀၂၀ပြည့်နှစ် အထွေထွေ ရွေးကောက်ပွဲတွင် ပြည်ထောင်စုရွေးကောက်ပွဲကော်မရှင်ကို မလျော်သြဇာလွမ်းမိုးသည်ဟု စွပ်စွဲချက်ဖြင့် စစ်ကောင်စီလက်အောက်ခံ ပြည်ထောင်စုရွေးကောက်ပွဲကော်မရှင်မှ ညွှန်မှူး ဦးအောင်မျိုးလွင်က တရားလိုပြုလုပ်ပြီး တရားစွဲခဲ့ခြင်းဖြစ်သည်။
စွပ်စွဲခံရသူများမှာ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ သမ္မတ ဦးဝင်းမြင့်နှင့် ပြည်ထောင်စုအစိုးရအဖွဲ့ရုံးဝန်ကြီးဌာန ပြည်ထောင်စုဝန်ကြီး ဦးမင်းသူတို့ဖြစ်သည်။
အဆိုပါအမှုတွင် တရားလို ဦးအောင်မျိုးလွင်အပါအဝင် တရားလိုပြသက်သေ ၂၂ဦးရှိပြီး လာမည့် ဖေဖော်ဝါရီ ၂၁ရက်နေ့ရုံးချိန်းတွင် တရားလိုပြသက်သေ ဦးဇော်သန်းသင်းကို စစ်ဆေးရန် စီစဥ်ထားသည်။
စွဲချက်အမိန့်ကို မေလ ၂ရက်နေ့တွင် ချမှတ်ရန် မှုခင်းစီမံခန့်ခွဲမှု အစည်းအဝေးတွင် ဆုံးဖြတ်ထားကြသည်။
အတိုင်ပင်ခံပုဂ္ဂိုလ်တို့ကို စွဲဆိုထားသည့် ပုဒ်မ ၁၃၀-ကမှာ ထောင်ဒဏ် သုံးနှစ်အထိဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်နိုင်သည်။
အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အနေဖြင့် အမှုပေါင်း ၁၇မှုဖြင့် တရားစွဲခံထားရပြီး ထိုအထဲမှ အမှု ငါးမှုအတွက် ထောင်ဒဏ် ခြောက်နှစ် ကျခံနေရသည်။ ပုဒ်မ ၁၃၀-ကမှာ ၎င်းကို စွဲဆိုသည့် ၁၇မှုမြောက် အမှုလည်းဖြစ်သည်။
သမ္မတ ဦးဝင်းမြင့်မှာလည်း အမှု နှစ်မှုအတွက် ထောင်ဒဏ် နှစ်နှစ်ကျခံနေရပြီး သောကြာနေ့တိုင်းအဂတိအမှု ငါးမှုဖြင့်လည်း တရားရင်ဆိုင်နေရသည်။
၎င်းတို့ကို စွဲဆိုထားသည့် အမှုများကို နေပြည်တော်ကောင်စီဝန်းအတွင်းရှိ အထူးတရားရုံးတွင်အပတ်စဥ် တနင်္လာ၊ ကြာသပတေးနှင့် သောကြာနေ့တိုင်း စစ်ဆေးလျက်ရှိသည်။