ဖေဖော်ဝါရီ ၁၅
မြိတ်ခရိုင် ပုလောမြို့၌ ယမန်နေ့ ဖေဖော်ဝါရီလ ၁၃ ရက်နေ့ နံနက်ပိုင်းက ပေါက်ကွဲမှု နှစ်ကြိမ် ဖြစ်ပွားခဲ့ပြီးနောက် မြို့လုံခြုံရေး တင်းကျပ်နေကြောင်း မြို့ခံများထံက သိရသည်။
ပုလောမြို့နယ် အထွေထွေ အုပ်ချုပ်ရေး ဦးစီးဌာနရုံးနှင့် မြို့နယ် ဦးစီးမှူး အိမ်တို့ ယမန်နေ့ ဖေဖော်ဝါရီလ ၁၃ ရက် နံနက် ၆ နာရီ ဝန်းကျင်တွင် ဗုံးပေါက်ကွဲခဲ့ခြင်း ဖြစ်ပြီး မြို့နယ် ဦးစီးမှူးအိမ် ပြတင်းပေါက်မှန်များ၊ တံခါးချပ်များ ထိခိုက် ပျက်စီး သွားသည်ဟု ဒေသခံ တစ်ဦးက ပြောသည်။
"ဗုံး နှစ်လုံး ဆက်တိုက် ပေါက်ကွဲတာ ဖြစ်တယ်။ လူအသေပျောက် ရှိတယ် လို့တော့ ကြားတယ်။ အတိ အကျတော့ မသိရသေးဘူး " ဟု ပုလောမြို့ ဒေသခံ တစ်ဦးက ပြောသည်။
ထိုအပြင် ပုလောမြို့ရှိ စစ်ဘက်ရေးရာ လုံခြုံရေးတပ်ဖွဲ့ (စရဖ) ရုံးလည်း အဆိုပါနေ့ နံနက် ၇ နာရီတွင် ထပ်မံ တိုက်ခိုက် ခံခဲ့ရကြောင်း ဒေသခံများက ပြောသည်။
လက်ရှိတွင် ဗုံးပေါက်ကွဲမှုကြောင့် ပုလောမြို့ မြို့နယ်ခန်းမ၊ စာသင်ကျောင်းနှင့် ပုလော တံတား ထိပ်တို့တွင် လုံခြုံရေးများ ချထားကာ စစ်ကားများဖြင့် လှည့်ကင်းများ ပတ်နေကြောင်း မြို့ခံက ပြောသည်။
