ပေကျင်းဆောင်းရာသီ အိုလံပစ်ပွဲတော်ကို သပိတ်မှောက်ရန် တောင်းဆိုမှုများရှိနေချိန်တွင် ဝီဂါ၊ ကာဇတ်၊ ကာဂျစ်နှင့် အရှေ့တာကစ္စတန်ရှိ အခြားသော တာကစ်လူမျိုးအပေါ် လူမျိုးတုံးသတ်ဖြတ်မှုနှင့် လူသားမျိုးနွယ်အပေါ်ကျူးလွန်သည့် အခြားသော ရာဇဝတ်မှုများကို စုံစမ်းစစ်ဆေးရန် အဝေးရောက်အရှေ့တာကစ္စတန်အစိုးရ (ETGE) က နိုင်ငံတကာ ရာဇဝတ်ခုံရုံး (ICC) အား ဖေဖော်ဝါရီ ၁ ရက်တွင် တိုက်တွန်းလိုက်သည်။

အဝေးရောက် အရှေ့တာကစ္စတန်အစိုးရနှင့် အရှေ့တာကစ္စတန်အမျိုးသားနိုးကြားရေးလှုပ်ရှားမှုမှ ရှေ့နေများသည် ၂၀၂၀ ခုနှစ်၊ ဇူလိုင်လ ၆ ရက်နေ့တွင် ICC သို့ တရားဝင်တိုင်ချက်ဖွင့်ခဲ့သည်။

အစ္စတန်ဘူလ်ရှိ ဝီဂါအသိုင်းအဝိုင်းရှိ ကိုယ်တွေ့ကြုံခဲ့ရသူများထံမှ နောက်ထပ်အထောက်အထားများနှင့် သက်သေခံချက်များကို စုဆောင်းရန် ဥပဒေအဖွဲ့သည် အစ္စတန်ဘူလ်တွင် ရှိနေခဲ့ကြောင်း ETGE ၏ သတင်းထုတ်ပြန်ချက်တွင် ဖော်ပြထားသည်။

NGO အများအပြားနှင့် အရှေ့တာကစ္စတန်မှ ကိုယ်တွေ့ကြုံခဲ့ရသူများနှင့်ပူပေါင်းကာ ETGE က အရှေ့တာကစ္စတန်တွင် လူမျိုးတုံးသတ်ဖြတ်မှုကို အသိအမှတ်ပြုရန် တူရကီအား တိုက်တွန်းခဲ့သည်။

ETGE ၏ ဝန်ကြီးချုပ် ဆာလီဟူဒါယာကအရှေ့တာကစ္စတန်နှင့် ၎င်း၏ပြည်သူများအား ထောက်ပံ့ကူညီရန် တူရကီအစိုးရ၊ အရပ်ဘက်လူမှုအဖွဲ့အစည်းများနှင့်တူရကီပြည်သူများအား တိုက်တွန်းသော ဗီဒီယိုမိန့်ခွန်းကို ပေးပို့ခဲ့ကြောင်း ထုတ်ပြန်ချက်တွင် ဖော်ပြထားသည်။

"ICC မှာ အရှေ့တာကစ္စတန်ရဲ့အမှုကို ထောက်ခံကြဖို့ တူရကီကို တိုက်တွန်းပါတယ်။ ICC မှာ တရုတ်ကို တိုင်ချက်ဖွင့်ခြင်းအားဖြင့် ဖိနှိပ်ခံရသူတွေကို ခုခံကာကွယ်မယ်ဆိုတဲ့ ကတိကဝတ်တွေကို ဆက်လက်ထိန်းသိမ်းထားဖို့ တူရကီကို မေတ္တာရပ်ခံပါတယ်” ဟု ဝန်ကြီးချုပ် ဆာလီဟူဒါယာက ပြောကြားခဲ့သည်။

"အရှေ့တာကစ္စတန်မှာလက်ရှိဖြစ်ပေါ်နေတဲ့တရုတ်ရဲ့လူမျိုးတုံးသတ်ဖြတ်မှုကိုလူမျိုးတုံးသတ်ဖြတ်မှုအဖြစ်အသိအမှတ်ပြုခြင်းအားဖြင့်တူရကီအစိုးရနဲ့လွှတ်တော်ကတရုတ်နိုင်ငံကိုရင်ဆိုင်ဝံ့ဖို့အရေးကြီးပါတယ်” ဟုဆာလီဟူဒါယာကပြောကြားခဲ့သည်။