ဖေဖော်ဝါရီ ၄
ထိုင်းနိုင်ငံသို့ ဝင်ရောက်နိုင်သည့် နယ်စပ်ဂိတ် နှစ်နေရာတွင် နှစ်ရက် အတွင်း မြန်မာနိုင်ငံသား ၂၅၀ ဦးကျော်ကို ထိုင်း အာဏာပိုင်များက ဖမ်းဆီး အရေးယူခဲ့ကြောင်း ဒေသတွင်း ထိုင်းမီဒီယာများတွင် ဖော်ပြထားသည်။
ဖေဖော်ဝါရီ ၂ရက်နေ့နှင့် ၃ရက်နေ့တို့၌ ဖမ်းဆီးမိထားသူများစာရင်းကို ဖော်ပြထားခြင်းဖြစ်သည်။
အဆိုပါ ဖမ်းဆီးခံရသည့် မြန်မာနိုင်ငံသား ၂၅၃ ဦး သည် ထိုင်းနိုင်ငံရှိ ခရိုင်များ ဖြစ်သည့် စမုဆာခွန်ခရိုင်၊ ရယောင်းခရိုင်၊ ကန်ကျနဘူရီခရိုင်နှင့် ဗန်ကော်မြို့တော် စသည့် နေရာများတွင် နယ်စပ်ဖြတ်ကျော်ပြီး ထိုင်းနိုင်ငံအတွင်း အလုပ်ရှာဖွေရန် တရားမဝင်သော နည်းလမ်းများဖြင့် လူမှောင်ခိုလမ်းနှင့် ထိုင်းသို့ ဝင်ရောက်ရာကနေ မြန်မာ-ထိုင်းနယ်စပ် ကန်ချနဘူရီခရိုင် ဆိုင်ယို့မြို့နယ်နှင့် စံခလဘူရီမြို့နယ်တို့တွင် နှစ်ရက်အတွင်း တရားမဝင် ဝင်ရောက်လာစဉ် ဖမ်းဆီး ခံရခြင်း ဖြစ်သည်ဟု သိရ သည်။
လက်ရှိတွင် ပြည်တွင်း၌ အလုပ်အကိုင် ရှားပါးမှုကြောင့် ထိုင်းတွင် အလုပ်ရဖို့ တစ်ဦးကို ဘက်ငွေ ၁၈၀၀၀ ကနေ ၂၅၀၀၀ ဘတ်ထိ ကုန်ကျခံပြီး ရောက်ရှိလာသူများ ဖြစ်သည်။
ထိုင်းနိုင်ငံတွင် ပြီးခဲ့သည့် ရက်ပိုင်းတွင် ကမ္ဘေဒီးယားနိုင်ငံသား ၁၈၅ ဦးကို MOU ဖြင့် ထိုင်းကို ဝင်ခွင့် ပေးခဲ့ပြီး မကြာမီရက်ပိုင်း အတွင်းမှာ ထိုင်းအစိုးရက မြန်မာနိုင်ငံသားများကိုလည်း တရားဝင် MOU ဖြင့် ခေါ်ယူရန် စီစဉ်နေကြောင်း ထိုင်းသတင်းတချို့တွင် ရေးသားဖော်ပြချက် အရသိရသည်။
