ဇန်နဝါရီလ ၃၁ ရက်
စစ်ကိုင်းတိုင်း၊ မုံရွာမြို့နယ်၊ တောပုကျေးရွာမှ ပျူစောထီးဆိုသည့်အဖွဲ့က အမျိုးသမီးတပ်စိတ်မှူးတစ်ဦးဖြစ်သူသည် သေနတ်ဖြင့် ပစ်ခတ်ခံရ၍ သေဆုံးသွားကြောင်း ဒေသခံထံမှ သိရသည်။
ယမန်နေ့ ဇန်နဝါရီလ ၃၀ရက် ည ၉နာရီ ၄၅မိနစ်ခန့်တွင် မယဉ်နွယ်သိမ့် (ခ) မီးမီး ဆိုသူအား ဗိုလ်စနေ ဒလန်ရှင်းလင်းရေးအဖွဲ့မှ ပစ်ခတ်ခဲ့ကြောင်း မုံရွာ-အမြင့်လမ်း သတင်းမှန်ပြန်ကြားရေးအဖွဲ့က ဆိုသည်။
“ပျူစောထီးအဖွဲ့ တပ်စိတ်မှူးဆိုတာ အသေအချာစုံစမ်းစစ်ဆေးပြီးမှ ရှင်းလင်းခဲ့တာပါ” ဟု ဗိုလ်စနေဒလန်ရှင်းလင်းရေးအဖွဲ့၏ သတင်းများအားထုတ်ပြန်ပေးနေသည့် မုံရွာ - အမြင့်လမ်း သတင်းမှန်ပြန်ကြားရေးအဖွဲ့က မဇ္ဈိမကိုပြောသည်။
ပစ်ခတ်ခံရ၍ သေဆုံးသွားသူသည် တောပုကျေးရွာသူဖြစ်ပြီး အသက် ၂၇နှစ်ခန့်ရှိ၍ ပန်းရောင်းသော အလုပ်လုပ်ကိုင်သူဖြစ်ကြောင်းသိရသည်။
တောပုရွာမြောက်ခြမ်းဖက်သည် ပျူစောထီးအဖွဲ့ဝင်အများစုနေထိုင်သည့်နေရာဖြစ်ပြီး တောင်ပိုင်းနှင့် အနောက်ပိုင်းဖက်နေသူများအား စစ်တပ်အားကိုးဖြင့် ရန်ရှာလေ့ရှိကြောင်း ဒေသခံကဆိုသည်။
ဇန်နဝါရီလ ၂၉ရက်နေ့ကလည်း မုံရွာမြို့နယ် ဘုဘကျေးရွာသား စစ်ကောင်စီသတင်းပေး အသက် ၃၅နှစ်အရွယ် မော်ကြီးဆိုသူအား ဗိုလ်စနေအဖွဲ့မှ ပစ်ခတ် အရေးယူမှုပြုလုပ်ခဲ့သေးသည်။
