ဒီဇင်ဘာလ ၂၆ ရက်
စစ်ကောင်စီတပ်၏ ရန်ကုန်တိုင်းစစ်ဌာနချုပ်စစ်တိုင်းမှူး ဗိုလ်ချုပ်ညွှန့်ဝင်းဆွေမှာ နေအိမ်အကျယ်ချုပ်ချခံထားရသည်ဟု CDM ပြုလုပ်နေသည့် ပြည်သူ့စစ်သားများအစုအဖွဲ့၏ လူမှုကွန်ရက်စာမျက်နှာတွင် ရေးသားထားသော ဆောင်းပါးတစ်ပုဒ်တွင် ပါရှိသည်။
" ရန်ကုန် အကြမ်းဖက်ကိစ္စတွေနဲ့ ငြိပြီး အဓိက ကားနဲ့တိုက်တဲ့ကိစ္စကြောင့် အခု နေအိမ်အကျယ်ချုပ် လို့ကြားနေရလို့။ မအလ (မင်းအောင်လှိုင်) အမြဲ အဲ့လိုလုပ်တယ်။ သူ့ရှေ့က ဗိုလ်ချုပ်တစ်ယောက် KIA ဗိုလ် လောင်းကုန်းကို လက် နက်ကြီးနဲ့ပစ်တယ်။Black list အသွင်းခံရတော့ တိုင်းမှူး မပေးတော့ဘူး။ ဂျောင်ထိုးလိုက်တယ်ဗျာ။သူပဲခိုင်းပြီး နာမည်ထွက်လာရင် အကုန်အရေးယူပစ်ပြီး သူကတရားမျှတပါတယ် လုပ်ပစ်တယ်။" ဟု အဆိုပါဆောင်းပါးတွင် ရေးသားဖော်ပြထားသည်။
ကိုယ်ပိုင်အမှတ်ကြည်း ၂၅၉၈၃၊ စစ်တက္ကသိုလ်အပတ်စဉ် (၃၆) ဆင်း ဗိုလ်ိချုပ်ညွှန့်ဝင်းဆွေမှာ နေအိမ်အကျယ်ချုပ်ချခံထားရသည်ဆိုသောသတင်းနှင့်ပတ်သက်၍ မဇ္ဈိမအနေဖြင့် သီးခြားအတည်ပြုချက်ရယူနိုင်ခြင်းမရှိပါ။
တပ်မတော် ဆေး တက္ကသိုလ် ကျောင်းအုပ်ကြီးနှင့် အနောက်တောင်တိုင်း စစ်ဌာနချုပ် တိုင်းမှူး တာဝန်များ ထမ်းဆောင်ခဲ့သူ ဗိုလ်ချုပ်ညွှန့်ဝင်းဆွေသည် ယမန်နှစ်လယ်က ရန်ကုန်တိုင်းစစ်ဌာနချုပ်တိုင်းမှူးအဖြစ်ခန့်အပ်ခံခဲ့ရသည်။
စစ်ကောင်စီတပ်အတွင်း တပ်တွင်းအရေးယူမှုများကို ထိပ်တန်းလျို့ဝှက်ချက်အဖြစ်သတ်မှတ်သတင်းအမှောင်ချထားလေ့ရှိပြီး တပ်တွင်း ဖရဲသီးဟုခေါ်ဝေါ်ကြသည့် ပြည်သူ့ဘက်ကိုပူးပေါင်းပါဝင်သူများက သတင်းထုတ်ပေးမှသာ သိကြရသည်။
ရှမ်းပြည်နယ် တောင်ပိုင်းမြို့နယ်တစ်ခုတွင် လေတပ်မှ ဗိုလ်မှူးအဆင့်ရှိသူတစ်ဦး ဒီဇင်ဘာ ၈ ရက်နေ့က " ဖရဲသီးအမှု" ဖြင့် အဖမ်းခံခဲ့ရပြီး ဒီဇင်ဘာ ၁၀ ရက်နေ့တွင် မီးသဂြိုလ်လိုက်ပြီဆိုကာ မိသားစုကို အကြောင်းကြားမှုဖြစ်ပွားခဲ့ကြောင်း တပ်တွင်းသတင်းရပ်ကွက်တစ်ခုအရသိရသည်။