ဒီဇင်ဘာလ ၂၆ ရက်
ကွမ်းခြံကုန်းမြို့နယ်၊ တော်ခရမ်းလေးရွာ အဝင်ရှိ စစ်ကောင်စီတပ် စစ်ဆေးရေးဂိတ်ကို ယနေ့ ဒီဇင်ဘာလ ၂၆ ရက် နံနက် ၃ နာရီ ၃၅ မိနစ်တွင် ကွမ်းခြံကုန်း ပြည်သူ့ကာကွယ်ရေးတပ် (Kungyangon-PDF) က ၄၀ မမ ဗုံးသီးဖြင့် ပစ်ခတ်ခဲ့သည်။
ကွမ်းခြံကုန်း ပြည်သူ့ကာကွယ်ရေးတပ်နှင့် မဟာမိတ်ဖြစ်သော တွံတေး ပြည်သူ့ကာကွယ်ရေးတပ် (Tontay- PDF) တာဝန်ရှိသူ တစ်ဦးက ယင်းဖြစ်စဉ်ကို အတည်ပြုသည်။
ပစ်ခတ်တိုက်ခိုက်မှုနှင့် ပတ်သက်သည့် အသေးစိတ်ကိုမှု လုံခြုံရေးအရ ဖြေကြားနိုင်ခြင်း မရှိဟု Tontay- PDF တာဝန်ရှိသူက ပြောသည်။
“တော်ခရမ်းလေးရွာအဝင် လမ်းထိပ်က စစ်တပ် ကင်းတဲ ဒီမနက် ၃ နာရီခွဲ လောက်က ဗုံးနဲ့ အပစ် ခံရတယ်လို့တော့ ကြားတယ်။ ထိခိုက်မှု ရှိ၊ မရှိတော့ မသိဘူး ” ဟု ဒေသခံတစ်ဦးက ပြောသည်။
ဒီဇင်ဘာလ ၁၈ ရက်ကလည်း ကော့မှူးမြို့နယ် မီးသတ်စခန်းကို ဒေသကာကွယ်ရေးတပ်ဖွဲ့များက ၄၀ မမနှင့် ပစ်ခတ်ခဲ့ပြီး စစ်ကောင်စီတပ်သားများ ထိခိုက်သေဆုံးမှု ရှိခဲ့သည်။
