ဒီဇင်ဘာလ ၂၅ ရက်
ဖားကန့်လုံးခင်းရတနာမြေအတွင်း အာဏာသိမ်းစစ်ကောင်စီ၏ လက်နက်ကိုင်များနှင့် ကချင်လွတ်လပ်ရေးတပ်မတော် (KIA)တို့အကြား တိုက်ပွဲများ ဖြစ်ပွားနေပြီး ဒေသခံများကို နေ့လည် ၁၂ နာရီနောက်ပိုင်း အပြင်မထွက်ရန်လည်း သတိပေးမှုများရှိနေသည်။
ဖားကန့်မြို့နယ် ဆိုင်းတောင် (ဆိပ်မူ) ကျေးရွာအုပ်စုအနီးတွင် ယမန်နေ့ (ဒီဇင်ဘာလ - ၂၄ ရက်နေ့)နေ့လည်ကနေ တိုက်ပွဲများစတင်ခဲ့ပြီး ညနေ ၄ နာရီကျော်လောက်မှာတော့ တိုက်ပွဲတွေက ပြင်းထန်လာခဲ့တာဖြစ်သည်ဟု ဒေသခံများကပြောသည်။
ယမန်နေ့ကတည်းက မော်ကလုံနှင့် ရွာဟောင်းအနီးမှာ စတင်တိုက်ပွဲတွေဖြစ်ပွားခဲ့ပြီး၊ ညနေပိုင်းအချိန်မှာတော့ ဆိုင်းတောင် မှော်ရှန်ကျေးရွာအနီးမှာ ဆက်လက်ဖြစ်ပွားသည်။
“ အသံက အကျယ်ကြီးကြားရသလို မြေကြီးတောင်တုန်တယ်။ ကျမတို့ဆို အိမ်အပေါ်မှာတောင်မနေရဲလို့ အိမ်အောက်မှာ ဝပ်နေကြရတယ်” ဟု ဆိုင်းတောင်မှဒေသခံတစ်ဦးက ပြောသည်။
“ရပ်ကွက်လူကြီးတွေလာပြောသွားတာဟုတ်တယ်။ ၁၂ နောက်ပိုင်း ဘယ်မှမထွက်တော့ဘဲ အိမ်မှာပဲ မိသားစုနဲ့နေဖို့ကို လာသတိပေးသွားတယ်။ မာရှယ်လောလားဆိုတော့လည်း အဲလိုတော့မဟုတ်ဘူးလို့တော့ ပြောတာပဲ။ ” ဟု သူက ထပ်ပြောသည်။
ဖားကန့်ဒေသဘက်တွင် စစ်ကောင်စီ၏ တပ်မ (၃၃)နှင့်ခလရ (၁၂၀) တို့က စစ်ရေးအရကူညီပေးနိုင်ဖို့အတွက် လှုပ်ရှားလာသည့်အတွက် ဆိုင်းတောင် (ဆိပ်မူ)ကျေးရွာအနီးက စစ်ကောင်စီ၏ ဗျုဟာကုန်းတပ်စခန်းကို ကချင်လွတ်လပ်ရေးတပ်မတော် (ကေအိုင်အေ) တပ်မဟာ (၉) လက်အောက် တပ်ရင်း(၆) တပ်ဖွဲ့ဝင်များက သွားရောက်တိုက်ခိုက်ခဲ့သည့်အတွက် အခုလိုတိုက်ပွဲတွေ ပြင်းထန်လာရတာဖြစ်တယ်လို့ ကေအိုင်အိုသတင်းပြန်ကြားရေးအဖွဲ့က ပြောသည်။
ဖားကန့်ဒေသမှာ တိုက်ပွဲများဆက်လက်ပြင်းထန်လာနိုင်သည်ဟု စစ်ရေးလေ့လာသူများကလည်း သုံးသပ်ထားကြသည်။