ဒီဇင်ဘာလ ၂၅ ရက်
မန္တလေးတိုင်း၊ မြင်းခြံမြို့နယ်၊ ယုန်ထိုးတောင်တွင် တောနင်းမည့် စစ်ကောင်စီတပ်ဖွဲ့သည် လမ်းတွင် အဝေးထိန်းစနစ် အသုံးပြုထားသည့် ပဒေသာမိုင်းနှစ်ကြိမ်ဆွဲခံရ၍ စစ်ကောင်စီတပ်ဖွဲ့ဘက်မှ သေဆုံးသူနှင့် ထိခိုက်ဒဏ်ရာရရှိသူများရှိကြောင်း ZERO ပြောက်ကျားတပ်ဖွဲ့ထံမှ သိရသည်။
အဆိုပါ မိုင်းကြိုဆွဲတိုက်ခိုက်မှုမှာ ဒီဇင်ဘာလ ၂၃ ရက်နေ့ နံနက် ၁၀ နာရီခန့်က ယုန်ထိုးတောင်အရှေ့ဘက်လမ်းတွင် စစ်ကားနှစ်စီးအားတစ်ကြိမ်၊ ည ၁၀ နာရီက ယုန်ထိုးဆည်နားတွင်တစ်ကြိမ် စုစုပေါင်း နှစ်ကြိမ်ပဒေသာမိုင်းဆွဲခဲ့ခြင်းဖြစ်ကြောင်း ZERO ပြောက်ကျားတပ်ဖွဲ့ခေါင်းဆောင်က မဇ္ဈိမကိုပြောသည်။
" အဲ့ဒီနေ့က မနက်တစ်ကြိမ်က စစ်ကားနှစ်စီး၊ ညတစ်ကြိမ်က ကင်းပုန်း၀ပ်နေတဲ့ကောင်တွေကိုဆွဲခဲ့တာပါ။ ပဒေသာမိုင်း လေးလုံးတွဲ မိုင်းနှစ်ဆင့် ထောင်ထားခဲ့တာ။၁၅ ကောင်သေတဲ့စာရင်းက နှစ်ကြိမ်မိုင်းဆွဲတဲ့ရလဒ်စာရင်းပါ။အလောင်းတွေကိုတော့ Light Truckကား နဲ့သယ်သွားတယ်"ဟု၎င်းကပြောသည်။
ယင်းဖြစ်စဉ်ဖြစ်ပြီးနောက် အဆိုပါယုန်ထိုးတောင်အနီးတစ်ဝိုက်အား စစ်ကောင်စီတပ်သား အင်အား ၂၀၀ က တောနင်း၍ တောင်ပုံကျေးရွာရှိ ဒေသခံ ခြောက်ဦးအား မိုင်းရှာရာတွင် လူသားဒိုင်းအဖြစ်အသုံးပြုရန် ဖမ်းဆီးခေါ်ဆောင်သွားကြောင်း ဒေသခံများထံမှသိရသည်။