ဒီဇင်ဘာလ ၁၇ ရက်
စစ်ကောင်စီဘက်မှပစ်ခတ်သည့် လက်နက်ကြီးကျည်များထပ်မံကျရောက်လာပါက ပြန်လည်ပစ်ခတ်မည်ဟု ထိုင်းနိုင်ငံဘက်မှ သတိပေးထားကြောင်း ကရင်အမျိုးသားအစည်းအရုံး (KNU) သတင်းရင်းမြစ်တစ်ခုအရသိရသည်။
ဒီဇင်ဘာ ၁၆ ရက်နေ့နှင့် ၁၇ ရက်နေ့တို့တွင် စစ်ကောင်စီဘက်မှ ပစ်ခတ်သည့် လက်နက်ကြီးကျည်ဆံများ ထိုင်းဘက်အခြမ်းသို့ ကျရောက်ခဲ့သည့်နောက် ယခုကဲ့သို့သတိပေးလာခြင်းဟု KNU တာဝန်ရှိသူတစ်ဦးကပြောသည်။
“ ဒီထက်များလာရင် သူတို့ပြန်ပစ်မယ်လို့ပြောတယ်။ ဘာလို့ဆို ဟိုက်ဘက်ကမ်းကို လက်နက်ကြီးတွေ တအားကျတယ်လို့ပြောတယ်။ ကျွန်တော်တို့ စစ်ရှောင်တွေလည်း ထွက်ပြေးရတာရှိတာကိုး ” ဟု ၎င်းကဆိုသည်။
ထိုင်းလူမျိုးများ၏ အသက်နှင့် အိုးအိမ် စည်းစိမ် လုံခြုံမှုကို ထိခိုက်ခြင်းရှိလာပါကလက်တုံ့ပြန်သွားမည်ဟု ထိုင်းအာဏာပိုင်များမှ ပြောဆိုခဲ့သည်ဟုဆိုသည်။
အလားတူ အဆိုပါလက်နက်ကြီးကြောင့် စစ်ဘေးရှောင်တစ်ဦးလည်း ထိခိုက်ဒဏ်ရာရရှိခဲ့သည်။ ယင်းနောက် ထိုင်းတပ်မတော်အနေဖြင့် နယ်စပ်တစ်လျှောက် စစ်တပ်များဖြန့်ကျက်ချထားပြီး ကင်းလှည့်မှု့များပြုလုပ်နေခဲ့သည်။
- ထိုင်း-မြန်မာနယ်စပ်တွင် ထိုင်းစစ်တပ်မှကင်းလှည့်နေစဉ်။
