ဒီဇင်ဘာလ ၁၇ ရက်
ရန်ကုန်တိုင်း၊ ဒဂုံမြို့သစ် မြောက်ပိုင်းမြို့နယ် (၃၅) ရပ်ကွက်ရှိ လမ်းများတွင် ယနေ့ ဒီဇင်ဘာလ ၁၆ ရက် နံနက် ၁၁ နာရီ ဝန်းကျင်က စစ်ကောင်စီတပ်ဖွဲ့နှင့် EPC လျှပ်စစ်ဝန်ထမ်းများက နေအိမ်များတွင် သွယ်ထားသည့် မီးကြိုးများကို လိုက်လံဖြတ်တောက်နေကြောင်း ဒေသခံများထံက သိရသည်။
" ခွေးကား(စစ်ကောင်စီကား) Double cap ငါးစီးနဲ့ ပတ်နေတာ။ အရပ်ဝတ်နဲ့ EPC ကဟာတွေလည်းပါတယ် ။ စစ်ကောင်စီတပ်က ကောင်တွေ သေနတ်တကားကားနဲ့ ဘေးမှာစောင့်ပေးနေတာ။ စောလှဘော်လမ်းကို ဖြတ်နေတာတွေ့တယ်။ လမ်းထိပ်က မိန်းချသွားတယ်။တချို့ကတော့ တိုင်ကမီတာပုံးကနေ ကြိုးလေးဖြုတ်သွားတယ်။ ကြိုးလည်းဖြတ်တယ်လို့လည်းပြောတယ် ။ မီတာဆောင်တဲ့အိမ်တွေရော၊ မဆောင်တဲ့အိမ်တွေရောဖြတ်တာ "ဟု ဒေသခံက မဇ္ဈိမကို ပြောသည်။
ယမန်နေ့ နံနက်ပိုင်းကလည်း သင်္ဃန်းကျွန်းမြို့နယ် စံပြရပ်ကွက်တွင် မီတာမဆောင်သည့် နေအိမ်များအား မီးလိုက်လံ ဖြတ်တောက်နေကြောင်း သိရသည်။
ယင်းကဲ့သို့ မီးဖြတ်တောက်ခံရမှုတွင် မီတာခ ပေးဆောင်နေသည့် နေအိမ်များလည်း ပါဝင်ကြောင်း ရပ်ကွက်နေပြည်သူများက ပြောသည်။
