ဒီဇင်ဘာလ ၁၃ ရက်

စစ်ကိုင်းတိုင်း၊ ရေဦးမြို့နယ် မြို့မရဲစခန်းနှင့် အောင်ချမ်းသာရပ်ကွက် အုပ်ချုပ်ရေးမှူးရုံးတို့အား ဒီဇင်ဘာလ ၁၃ ရက် နေ့လည် ၁၂ နာရီ ၅ မိနစ်တွင် လက်နက်ကြီးငယ်တို့ဖြင့် ပစ်ခတ်တိုက်ခိုက်ခဲ့ကြောင်း YE-U Urban Guerrilla အဖွဲ့၏ ထုတ်ပြန်ချက်အရ သိရသည်။

ရဲစခန်းနှင့် ရပ်ကွက်ရုံးကို လက်ပစ်ဗုံးဖြင့် တိုက်ခိုက်ခြင်း၊ လက်နက်ကြီး၊ လက်နက်ငယ်တို့ဖြင့် ပစ်ခတ်ခြင်းများ ပြုလုပ်ခဲ့ကြောင်း YE-U Urban Guerrilla အဖွဲ့က ထုတ်ပြန်ထားသည်။

"ကျွန်တော်တို့ ရဲစခန်းကို လက်နက်ကြီး (၄၀ မမ) နဲ့ ငါးချက်ပစ်တယ်။ ပြီးတော့ အုပ်ချုပ်ရေးမှူးရုံးကို ဗုံးတစ်လုံး အရင်ပစ်တယ်၊ ပြီးတော့ Shot Gun နှစ်လက်နဲ့ပစ်တယ်။ ထိခိုက်မှုကတော့ ရှိနိုင်တယ်" ဟု YE-U Urban Guerrilla အဖွဲ့ကပြောသည်။

အဆိုပါ ပစ်ခတ်တိုက်ခိုက်မှုအတွင်း စစ်ကောင်စီ ရဲများ၏ ပြန်လည်ပစ်ခတ်မှုကြောင့် ၁၀ နှစ်အရွယ် ကလေးတစ်ဦး ကျည်ထိမှန် သေဆုံးကြောင်း ရေဦး‌ မြေပြင်ကင်းထောက်တစ်ဦးကို ကိုးကားကာ ခေတ်သစ်မီဒီယာက ဖော်ပြထားသော်လည်း မဇ္ဈိမ အနေဖြင့် သီးခြား အတည်ပြုနိုင်ခြင်း မရှိသေးပေ။ 

"အသံ သုံးချက် ကြားလိုက်တယ်၊ ပထမတစ်ချက်ကတော့ တော်တော်ကျယ်တယ်၊ အုပ်ချုပ်ရေးမှူးရုံးမှာလည်း ပစ်သံကြားလိုက်တယ်၊ ရဲစခန်းကို မီးသတ်ရုံးနားကနေ ပစ်တာလို့ပြောတယ်၊ လူထိခိုက်တာတော့ မကြားသေးဘူး။ ခဏတော့ ရပ်သွားတယ်။ လူသွားလူလာတွေ လူထိခိုက်တာတော့ မကြားဘူး"ဟု ရေဦးမြို့ပေါ်နေ ဒေသခံတစ်ဦးက မဇ္ဈိမကို ပြောသည်။ 

ယင်းတိုက်ခိုက်မှုကို ရေဦး PDF ၊ ရေဦးမြို့ပြ ပြောက်ကျားအဖွဲ့(YUG)၊ ရေဦး ပ.က.ဖ၊ Myanmar Defence Force-Depayin နှင့် အထူးကွန်မန်ဒို အဖွဲ့တို့ ပူးပေါင်းလုပ်ဆောင်ခဲ့ခြင်း ဖြစ်သည်။

ရေဦး ပ.က.ဖ အဖွဲ့ကလည်း "ပြောက်ကျားတိုက်စစ် စတင်ပါပြီ" ဟု ၎င်းတို့၏ လူမှုကွန်ရက် စာမျက်နှာတွင် ရေးသားထားပြီး "မြို့အဝင်အထွက် CCTV များ ဖြုတ်ထားပေးရန်" လည်း တောင်းဆိုထားသည်။