နိုဝင်ဘာ ၂၉
မြိတ်ခရိုင် ၊ ပုလောမြို့နယ်၊ ပဝတ်ကုန်းရွာရှိ ပျူစောထီး နေအိမ်များကို ပုလော PDF အဖွဲ့က နိုဝင်ဘာလ ၂၇ ရက် ည ၁၂ နာရီခန့်တွင် သွားရောက် ပစ်ခတ်ရာ အပြန်အလှန် ပစ်ခတ်မှု ဖြစ်ခဲ့ကြောင်း ပုလော PDF အဖွဲ့ထံမှ သိရသည်။
ပျူစောထီးများကို စစ်ကောင်စီက လက်နက် တပ်ဆင်ပေးထားသည် ဆိုသော သတင်းများ ထွက်ပေါ်နေ၍ ပြည်သူ့စစ် အဖွဲ့ဝင် (ပျူစောထီးအဖွဲ့ဝင်) ဦးထွန်းထွန်း နှင့် ဦးပေသီးတို့၏ နေအိမ်ကို ပုလော PDF က သွားရောက် ပစ်ခတ်ခဲ့ခြင်း ဖြစ်သည်။
"ကျွန်တော်တို့ တိုက်ပွဲ ဖြစ်တော့ အထဲက ပြန်ပစ်တယ်။ သူတို့က ပြင်ဆင်ထားပုံပဲ။ အထဲမှာလည်း အင်အားများတယ်။ နှစ်ဖက်စလုံး ထိခိုက်မှုတော့ မရှိပါဘူး"ဟု ပုလော PDF မှ တာဝန်ရှိသူက ပြောသည်။
ထိတွေ့တိုက်ပွဲတွင် နှစ်ဖက် အကျအဆုံး မရှိဘဲ ပျူစောထီးနေအိမ်မှ ပစ္စည်းအချို့ ပျက်စီး ဆုံးရှုံး ခဲ့သည်ဟု ဆိုသည်။