နိုဝင်ဘာ ၁၄
ပဲခူးတိုင်းဒေသကြီး၊ သာယာဝတီခရိုင်၊ နတ်တလင်းမြို့နယ်၊ တောင်ညိုမြို့သစ်တွင် တောင်ညိုနယ်မြေရဲစခန်းမှ သေနတ်ဖြင့် ပစ်ခတ်ခဲ့မှုကြောင့် အသက်၁၃နှစ်အရွယ် ကလေးငယ်တစ်ဦး ကျည်ဆန်ထိမှန်ကာ ဆေးရုံသို့ ပို့ဆောင်ထားရကြောင်း ဒေသခံများထံမှ သိရသည်။
ယမန်နေ့ နိုဝင်ဘာ ၁၃ရက် ညနေ ၄ နာရီဝန်းကျင်တွင် ကလေးငယ်တစ်ဦးက တောင်ညိုနယ်မြေရဲစခန်းရှေ့ ဆိုင်ကယ်ဖြင့်ဖြတ်သန်းသွားလာစဉ် ရဲစခန်းထဲမှ သေနတ်ဖြင့် ပစ်ခတ်မှုကြောင့် ဒဏ်ရာရရှိခဲ့ကြောင်း သိရသည်။
"ကောင်လေးက စခန်းရှေ့ ဆိုင်ကယ်နဲ့ဖြတ်မောင်းတာကို ဘာမပြော ညာမပြောနဲ့ ပစ်ထည့်လိုက်တာ နှစ်ချက်ဗျ။ ရင်ဘက်ထိသွားတယ်။ ထိသွားတော့ ကောင်လေးကို စခန်းထဲခေါ်သွားတယ်။ ခဏနေတော့ အရေးပေါ်ကားရောက်လာပြီး ပြည်ဆေးရုံကိုပို့လိုက်ကြတယ်”ဟု ဒေသခံတစ်ဦးမှ ပြောသည်။
ပစ်ခတ်ခံရသူမှာ ခြောက်တန်းကျောင်းသား မောင်ပိုပိုဖြစ်ပြီး တောင်ညိုမြို့သစ် အောင်ဇေယျ (၇)လမ်းတွင် နေထိုင်သူဖြစ်ကြောင်း မဇ္ဈိမက လတ်တလော စုံစမ်းသိရှိထားသည်။
တောင်ညိုမြို့သစ်တွင် ပြီးခဲ့သည့်ရက်ပိုင်းအတွင်း ဒေသခံပြည်သူ့ကာကွယ်ရေးတပ်၏ တိုက်ခိုက်မှုကြောင့် ကျေးရွာအုပ်ချုပ်ရေးမှူးအပါအဝင် သုံးဦးသေဆုံးကာ နှစ်ဦးဒဏ်ရာရရှိခဲ့သည့်အတွက် တောင်ညိုနယ်မြေအတွင်းရှိ ကျေးရွာများကို စစ်တပ်မှ ပြင်းပြင်းထန်ထန် ရှာဖွေဖမ်းဆီးမှုများ ပြုလုပ်နေကြောင်းသိရသည်။
