နိုဝင်ဘာ ၁၂
ပဲခူးမြို့ရှိ လျှပ်စစ်ဓာတ်အားခွဲရုံတစ်ခုနှင့် အုပ်ချုပ်ရေးမှူးရုံးတစ်ခုတို့တွင် ယနေ့ညနေက ဗုံးဖောက်ခွဲမှုများပြုလုပ်ခဲ့ကြောင်းနှင့် ဝန်ထမ်းလေးဦးဒဏ်ရာရသွားကြောင်း ဒေသခံ ပြောက်ကျားတပ်ဖွဲ့က မဇ္ဈိမသို့ပြောသည်။
အမှတ် (၂) လျှပ်စစ်ခွဲရုံနှင့် မဟာမြိုင်ရပ်ကွက်အုပ်ချုပ်ရေးမှူးရုံးကို ညနေ ၄ နာရီ ၄၅ မိနစ်တွင် ဖောက်ခွဲမှုများပြုလုပ်ရာ လျှပ်စစ်ရုံးမှ ဝန်ထမ်းလေးဦး ထိခိုက်ဒဏ်ရာရသွားခဲ့သည်ဟု Bago Guerrilla Force(BGF) ကပြောသည်။
“ တပြိုင်တည်းဖောက်ခွဲတာပါ။ လျှပ်စစ်ရုံးမှာက ဝန်ထမ်းလေးယောက်ထိတယ်၊ နှစ်ယောက်က ပြင်းထန်တယ်။ အုပ်ကြီးရုံးမှာတော့ အထိအခိုက်မသိရသေးဘူးဗျ။ ဘာလို့လုပ်လဲဆိုတော့ ပြည်သူတွေကို အတင်းအကြပ် မီတာခဆောင်ခိုင်းတယ်၊ မီးဖြတ်တယ်။ အဲ့ဒါတွေကြောင့် အခုလိုလုပ်တာပါ”ဟု ပဲခူးပြောက်ကျား BGF မှ ပြောဆိုခွင့်ရှိသူ တစ်ဦးက ပြောသည်။
ပေါက်ကွဲမှု့များအပြီး စစ်တပ်မှ ရောက်ရှိလာကာ လမ်းများပိတ်ဆို့ရှာဖွေနေပြီး အရပ်ဝတ်ဖြင့် အိမ်စီးကားများအသုံးပြုကာ ရှာဖွေမှု့များပြုလုပ်နေခဲ့သည်။