တရုတ်နိုင်ငံ ပေကျင်းမြို့တွင် လေထုညစ်ညမ်းမှုကြောင့် အဝေးပြေးလမ်းများနှင့် ကစားကွင်းများကို နိုဝင်ဘာ ၅ ရက်က ပိတ်ထားခဲ့သည်။ တရုတ်သည် ကျောက်မီးသွေး ထုတ်လုပ်မှုကို အရှိန်မြှင့်နေပြီး နိုင်ငံတကာ ရာသီဥတုဆိုင်ရာ ဆွေးနွေးပွဲများတွင် ၎င်း၏ သဘာဝပတ်ဝန်းကျင်ဆိုင်ရာ မှတ်တမ်းများအပေါ် စိစစ်မှုကို ရင်ဆိုင်နေရချိန်တွင် ယခုပြဿနာ ထွက်ပေါ်လာခြင်းဖြစ်သည်။

ပေကျင်း စည်ပင်သာယာရေး အစိုးရအဖွဲ့သည်လေထုညစ်ညမ်းမှု ဆိုးရွားလာသည့် အတွက် အဝါရောင် သတိပေးချက် ထုတ်ပြန်ခဲ့ကာ နိုဝင်ဘာ ၄ ရက် ညနေ ၄ နာရီမှ စတင်အသက်ဝင်ခဲ့သည်ဟု ဆင်ဟွာ သတင်းဌာနက ဖော်ပြသည်။ လေထုညစ်ညမ်းမှုအတွက် နိုင်ငံ၏သတိပေးစနစ်အရ အနီရောင်သည် အပြင်းထန်ဆုံးသတိပေးချက်ဖြစ်သည်။ ၎င်းအောက်တွင် လိမ္မော်၊ အဝါနှင့် အပြာရောင်တို့ ဖြစ်သည်။

မြို့တော်မိုးလေဝသအာဏာပိုင်များ၏ အဆိုအရ နိုဝင်ဘာ ၃ ရက်မှ ၆ ရက်အထိ ပေကျင်းနှင့် အနီးတစ်ဝိုက် ဒေသများတွင် မီးခိုးမြူများ ဖုံးလွှမ်းမှုနေခဲ့ကာ ရာသီဥတုအခြေအနေ ဆိုးရွားခဲ့သည်။

ကမ္ဘာပေါ်တွင် ဖန်လုံအိမ်ဓာတ်ငွေ့အများဆုံးထုတ်လွှတ်သည့်နိုင်ငံဟု ယူဆရသောတရုတ်သည် ဓာတ်ငွေ့ထုတ်လွှတ်မှု လျှော့ချရေး တင်းကျပ်သော ရည်မှန်းချက်များကြောင့် စွမ်းအင်အကျပ်အတည်းဖြစ်ကာ မကြာသေးမီလများအတွင်း ကုန်ပစ္စည်းထုတ်လုပ်သည့် လုပ်ငန်းစဉ်များ ထိခိုက်ခဲ့ရပြီး ကျောက်မီးသွေးထုတ်လုပ်မှုကို အရှိန်မြှင့်ခဲ့သည်ဟု Bangkok Post ၌ဖော်ပြထားသည်။

နိုဝင်ဘာ ၅ ရက်က တရုတ်နိုင်ငံ မြောက်ပိုင်းဒေသများတွင် မီးခိုးမြူများ ထူထပ်စွာ ဖုံးလွှမ်းသွားခဲ့သလို အချို့နေရာများတွင် မီတာ ၂၀၀ အကွာအဝေးအတွင်းသာ မြင်နိုင်သည်။

တရုတ်တွင် မကြာသေးခင်လများအတွင်းက စွမ်းအင်ပြတ်တောက်မှုကြောင့် စက်ရုံများကို ပိတ်ခဲ့ရသည့် ပြဿနာကို သက်သာစေရန် နေ့စဉ်ကျောက်မီးသွေးထုတ်လုပ်မှုကို တန်ချိန် ၁သန်းကျော်အထိ တိုးမြှင့်ခဲ့သည်ဟု ယခုသီတင်းပတ်အစောပိုင်းက ပြောခဲ့သည်။