နိုဝင်ဘာ ၅
ကရင်အမျိုးသား အစည်းအရုံး (KNU)၏ ထိန်းချုပ်နယ်မြေများ၌ အောက်တိုဘာလအတွင်း တိုက်ပွဲ ၂၇၅ ကြိမ် ဖြစ်ပွားခဲ့ပြီး စစ်ကောင်စီဘက်မှ ၂၇၁ ဦး သေဆုံးကာ ၂၆၆ဦး ထိခိုက်ဒဏ်ရာ ရခဲ့ကြောင်း KNU က ယနေ့ နိုဝင်ဘာလ ၅ ရက်တွင် သတင်းထုတ်ပြန်သည်။
စစ်ကောင်စီတပ်နှင့် နယ်ခြားစောင့်တပ်ဘက်မှ သေဆုံးခဲ့သူများတွင် တပ်ရင်းမှူး တစ်ဦး၊ တပ်ခွဲမှူး တစ်ဦး၊ ဗိုလ်မှူးတစ်ဦး၊ ဗိုလ်ကြီး နှစ်ဦး နှင့် ဗိုလ်နှစ်ဦးတို့ ပါဝင်ခဲ့ကြောင်း ထုတ်ပြန်ထားသည်။
ဒဏ်ရာရသူ ၂၆၆ ဦးတွင်လည်း ဒု-တပ်ရင်းမှူး တစ်ဦး၊ ဒု-ဗိုလ်မှူးကြီး တစ်ဦး၊ တပ်ကြပ်ကြီး တစ်ဦး ပါဝင်ကြောင်း သိရသည်။
KNU ၏ ကရင်အမျိုးသား လွတ်မြောက်ရေး တပ်မတော် ( KNLA ) နှင့် ကရင်အမျိုးသား ကာကွယ်ရေး တပ်ဖွဲ့ ( KNDO ) ဘက်မှလည်း နှစ်ဦး ကျဆုံးပြီး အယောက်၂၀ ဒဏ်ရာ ရရှိခဲ့သည်ဟု ဆိုသည်။
KNU ၏ ထိန်းချုပ်နယ်မြေများ ဖြစ်သည့် သထုံခရိုင်၊ တပ်မဟာ(၁) နယ်မြေ၊ တောင်ငူခရိုင် တပ်မဟာ (၂) နယ်မြေ၊ ညောင်လေးပင်ခရိုင် တပ်မဟာ (၃) နယ်မြေ၊ မူတြော်ခရိုင် တပ်မဟာ (၅ )နယ်မြေ နှင့် ဒူးပလာယာခရိုင် တပ်မဟာ (၆) နယ်မြေများတွင် တိုက်ပွဲများ ဖြစ်ပွားခဲ့ခြင်း ဖြစ်သည်။
