အိန္ဒိယနိုင်ငံတဝန်း လုပ်ဆောင်လျက်ရှိသည့် COVID-19 ကာကွယ်ဆေး ထိုးနှံမှု ကမ်ပိန်းကို ထပ်မံအရှိန်အားကောင်းစေရန်အတွက် ယင်းနိုင်ငံ၏ တတိယမြောက် ပြည်တွင်းထုတ် COVID-19 ကာကွယ်ဆေး Corbevax ကို နိုဝင်ဘာလကုန်တွင် တရားဝင် စတင်မိတ်ဆက်ဖြန့်ဖြူးသွားမည် ဖြစ်ကြောင်း ယင်းကာကွယ်ဆေးထုတ်လုပ်သည့် အိန္ဒိယဆေးကုမ္ပဏီ Biological E Limited က အောက်တိုဘာ ၂၅ ရက်က ပြောသည်။
ဟိုက်ဒါရာဘတ်၌ ပြုလုပ်သည့် အခမ်းအနားတစ်ခုတွင် Biological E Limited ၏ မန်နေဂျင်း ဒါရိုက်တာ မာဟီမာ ဒက်တ်လာက သတင်းထောက်များကို ပြောကြားရာတွင် "ဟိုက်ဒါရာဘတ် အခြေစိုက် Biological E Limited အနေနဲ့ ကိုရိုနာဗိုင်းရပ်စ်ကာကွယ်ဆေး Corbevax ကို နိုဝင်ဘာလကုန်မတိုင်မီ တရားဝင် မိတ်ဆက်နိုင်ဖို့ မျှော်မှန်းထားပါတယ်၊ ဒါက ကျွန်မတို့ရဲ့ မျှော်မှန်းချက် ဖြစ်ပါတယ်၊ အဲဒီ ထုတ်ဖော်တဲ့နေ့မှာပဲ ကျွန်မတို့ဟာ ဆေးအလုံးရေ သန်း ၁၀၀ ပံ့ပိုးပေးအပ်သွားမှာ ဖြစ်ပါတယ်" ဟု ၎င်းက ပြောသည်။
COVID-19 ကာကွယ်ဆေး Corbevax ၏ အပြီးသတ် လက်တွေ့စမ်းသပ်ချက် ဒေတာများကို နိုဝင်ဘာလကုန်မတိုင်မီ တင်သွင်းသွားမည် ဖြစ်သည်ဟု Biological E Limited က အောက်တိုဘာ ၁၄ ရက်တွင် ပြောခဲ့ကြောင်း အိန္ဒိယအစိုးရသတင်းရင်းမြစ်များက ဖော်ပြသည်။
အစိုးရအနေဖြင့် ယင်း COVID-19 ကာကွယ်ဆေး Corbevax ၏ အဆင့် ၃ ဒေတာအချက်အလက်များကို အောက်တိုဘာလမတိုင်မီ တင်သွင်းလိမ့်မည်ဟု မျှော်မှန်းခဲ့သော်လည်း ကုန်ကြမ်း ဝယ်ယူမှုပိုင်း နှောင့်နှေးကြန့်ကြာမှုကြောင့် ဟိုက်ဒါရာဘတ် အခြေစိုက် Biological E Limited သည် Corbevax အတွက် အရေးပေါ် အသုံးပြုခွင့် အတည်ပြုချက်ရရေးအတွက် နိုဝင်ဘာကုန်တွင် လျှောက်ထားလိမ့်မည်ဟု မျှော်လင့်ရသည်။
Corbevax သည် အိန္ဒိယ၏ တတိယမြောက် ပြည်တွင်းထုတ် COVID-19 ကာကွယ်ဆေး ဖြစ်သည်။ အခြား ပြည်တွင်းဖြစ် ကာကွယ်ဆေးနှစ်မျိုးမှာ Covaxin နှင့် ZyCoV –D တို့ဖြစ်သည်။ ဒီဇင်ဘာလတွင် Corbevax ဆေးအလုံးရေ သန်း ၃၀၀ ရရှိရေး မှာယူထားကြောင်း အိန္ဒိယအစိုးရက အစောပိုင်းက ကြေညာခဲ့သည်။
"အိန္ဒိယရဲ့ COVID-19 ကာကွယ်ဆေးထိုးမှုဆိုင်ရာ ဖြန့်ကျက်မှုက အောက်တိုဘာ ၂၅ ရက်မှာ ၁၀၂ ဒသမ ၈ ကုဋေ (၁,၀၂,၈၆,၆၉,၀၅၃) ကို ရောက်ရှိခဲ့ပါတယ်၊ ဒီနေ့ ညနေ ၇ နာရီအထိ ကာကွယ်ဆေးအလုံးရေ ၅၈ သိန်း (၅၈,၈၇,၉၈၁) ကို ထိုးနှံပေးထားပြီးပါပြီ၊ နေ့အလိုက် ကာကွယ်ဆေးထိုးမှု စာရင်းက ဒီညအထိ တစ်နေ့တာ အပြီးသတ် အစီရင်ခံစာတွေ စုစည်းမှုနဲ့အတူ မြင့်တက်ဖွယ် ရှိနေပါတယ်" ဟု အိန္ဒိယ ကျန်းမာရေးဝန်ကြီးဌာနက အောက်တိုဘာ ၂၅ ရက်တွင် ဖော်ပြသည်။
