တရုတ်၏ ဂျကာတာ-ဘန်ဒေါင်းအမြန်ရထားလမ်းစီမံကိန်းဆိုင်ရာ သတ်မှတ်ကုန်ကျစရိတ် ကျော်လွန်မှုကို ရင်ဆိုင်နေရသော အင်ဒိုနီးရှားအစိုးရသည် ဆောက်လုပ်ရေးနှောင့်နှေးမှုများနှင့် မြေယာ သိမ်းဆည်းမှုပြဿနာများ ဆက်လက်ဖြစ်ပေါ်နေသည့် စီမံကိန်းများအတွက် နိုင်ငံတော်ဘတ်ဂျက်ထဲမှ ထုတ်ယူသုံးစွဲရန် အခက်အခဲ ကြုံတွေ့နေရသည်။
အရှည် ၁၄၃ ကီလိုမီတာရှိသည့် ရထားလမ်း ဖောက်လုပ်ရေး စီမံကိန်း၏ ကုန်ကျစရိတ်မှာ အမေရိကန်ဒေါ်လာ ၆ ဒသမ ၀၇ ဘီလီယံမှ ၈ ဘီလီယံကျော်အထိမြင့်တက်လာပြီးသတ်မှတ်ချိန်ထက် ၂ နှစ် နောက်ကျသော၂၀၂၂ ခုနှစ် နှောင်းပိုင်းတွင် ပြီးစီးရန် လျာထားသည်ဟုAsia Times က ဖော်ပြသည်။
၂၀၁၅ ခုနှစ်တွင် စတင်ခဲ့သည့် ထိုစီမံကိန်းသည် အင်ဒိုနီးရှားနှင့် အခြားနိုင်ငံအများအပြားအား မမြင်နိုင်သောအကြွေးတောင်ပုံရာပုံဖြစ်စေသည့် တရုတ်နိုင်ငံ၏ ရည်မှန်းချက်ကြီးမားသော ခါးပတ်လမ်းစီမံကိန်း (BRI) ၏ အစိတ်အပိုင်းတစ်ခုဖြစ်ကြောင်းAidDataသုတေသနအရသိရသည်။
တရုတ်နိုင်ငံသည် တရားဝင်ဖွံ့ဖြိုးမှုအကူအညီ (ODA) သို့မဟုတ် အခြားတရားဝင်စီးဆင်းမှု (OOF) ပုံစံဖြင့် ၂၀၀၀ ခုနှစ်မှ ၂၀၁၇ ခုနှစ်အတွင်း အင်ဒိုနီးရှားအတွက် ဘဏ္ဍာရေးအကူအညီ အမေရိကန်ဒေါ်လာ ၃၄ဒသမ၉ ဘီလီယံကျော် ပေးမည်ဟု ကတိပြုခဲ့ကြောင်း အစီရင်ခံစာတွင် ဖော်ပြချက်ကို Asia Times သတင်းတွင် ဖော်ပြထားသည်။
သုတေသီများ၏အဆိုအရ အင်ဒိုနီးရှားအစိုးရသည် တရုတ်အပေါ် အစိုးရကြွေးမြီအမေရိကန်ဒေါ်လာ ၄ ဒသမ ၉၅ ဘီလီယံတင်နေပြီး ဖုံးကွယ်ထားသောပြည်သူ့ကြွေးမြီက အမေရိကန်ဒေါ်လာ ၁၇ ဒသမ ၂၈ ဘီလီယံရှိသည်။ ထိုကြွေးမြီများသည် အစိုးရအာမခံချက်များမပါရှိသော နိုင်ငံပိုင်ကုမ္ပဏီများသို့မဟုတ် အခြားသောအစိုးရအဖွဲ့အစည်းများမှ ကျသင့်ခံရသည်ဟုAsia Timesကဖော်ပြသည်။
ထို့ပြင် နိုင်ငံအသီးသီးက တရုတ်နိုင်ငံကို အနည်းဆုံး အမေရိကန်ဒေါ်လာ ၃၈၅ ဘီလီယံ ကြွေးတင်နေကာ ထိုချေးငွေများသည်ကမ္ဘာ့ဘဏ်နှင့် အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) ကဲ့သို့သော နိုင်ငံတကာ ငွေချေးငှားသူများ၏ စိစစ်မှုကိုလည်းကျော်လွှားခဲ့ကြောင်းအစောပိုင်းအစီရင်ခံများအရသိရသည်။
တရုတ်နိုင်ငံပြည်ပချေးငွေများ၏ ၇၀ရာခိုင်နှုန်းနီးပါးသည် ဗဟိုအစိုးရအဖွဲ့အစည်းများဖြစ်သော အချုပ်အခြာအာဏာပိုင်ငွေချေးငှားသူများထက်ယခုအခါ လက်ခံနိုင်ငံများရှိနိုင်ငံပိုင်ကုမ္ပဏီများ၊ နိုင်ငံပိုင်ဘဏ်များ၊ သီးခြားလုပ်ငန်းရည်ရွယ်ချက်အတွက် ဖွဲ့စည်းထားသောကုမ္ပဏီ၊ ဖက်စပ်လုပ်ငန်းများနှင့် ပုဂ္ဂလိကကဏ္ဍအဖွဲ့အစည်းများထံသို့ ဦးတည်ကြောင်းလေ့လာမှုတွင် ထည့်သွင်းဖော်ပြထားသည်။
