အောက်တိုဘာ ၂၇
ရှမ်းပြည်နယ်မြောက်ပိုင်း၊ လားရှိုးမြို့၊ ရေကန်လမ်းရှိ မိုင်တဲ ရုံးရှေ့တွင် ယမန်နေ့ အောက်တိုဘာလ ၂၆ရက်နေ့ ညနေ ၆နာရီ ၄၀ မိနစ်ဝန်းကျင်က ဗုံးတစ်လုံးပေါက်ကွဲမှု ဖြစ်ပွားခဲ့သည်ဟု အနီး၀န်းကျင်ရှိ ဒေသခံများထံမှ သိရသည်။
ပေါက်ကွဲမှုမှာ ရဲစခန်းနှင့်နီးကပ်ပြီး ရဲနှင့်စစ်ကောင်စီတပ်သားများ လမ်းထဲသို့ အများအပြားရောက်ရှိလာသဖြင့် ဖြစ်စဥ်ကို အသေးစိတ်မသိရသော်လည်း ဗုံးပေါက်ကွဲမှုမှာ ပြင်းထန်နိုင်ကြောင်း အဆိုပါရုံးအနီးပတ်ဝန်းကျင်တွင်နေထိုင်သူတစ်ဦးကပြောသည်။
"အသံကတော့အရမ်းကျယ်တယ်။ ရဲစခန်းနဲ့လည်း နီးနီးလေး ဖြစ်ပြီးတော့ သူတို့တွေ အများကြီးရောက်လာတယ်။ သေချာတော့ မသိရသေးဘူးပေါ့။ပြင်းတော့ပြင်းလောက်တယ်" ဟု၎င်းကပြောသည်။
ယခုဖြစ်စဉ်သည် ရှမ်းပြည်မြောက်ပိုင်းတွင် မိုင်တဲ ရုံးများကို ဦးတည်တိုက်ခိုက်ခံရသည့် ပထမဆုံးဖြစ်စဥ်ဖြစ်သည်။
လားရှိုးမြို့တွင် မြောက်ပိုင်း မဟာမိတ်တပ်ဖွဲ့ဝင်များဖြစ်ကြသော သျှမ်းပြည်တိုးတက်ရေးပါတီ (SSPP/SSA)၊ တအာန်းအမျိုးသားလွတ်မြောက်ရေးတပ်မတော် (TNLA)၊ ကိုးကန့်တပ်ဖွဲ့ (MNDAA) နှင့် ကချင်လွတ်လပ်ရေးတပ်မတော် (KIA ) တို့အပြင် ဒေသခံ ပြည်သူ့ကာကွယ်ရေးတပ်ဖွဲ့ (PDF) များလည်းရှိသည်။
