အောက်တိုဘာ ၂၆
ပဲခူးတိုင်းဒေသကြီးအတွင်းရှိ ပဲခူးမြို့၊ သက္ကလမြို့၊ ရေတာရှည်မြို့နှင့် ပေါင်းတည်မြို့တို့မှ ရပ်ကျေးအုပ်ချုပ်ရေးမှူးများ အပြိုင်အဆိုင် နုတ်ထွက်နေကြကြောင်း ဒေသခံများထံက သိရသည်။
ယခုလပိုင်းအတွင်း ရပ်ကျေးအုပ်ချုပ်ရေးမှူးများ ဆက်တိုက်ဆိုသလို သေနတ်ဖြင့် အပစ်ခံရခြင်း၊ အသတ်ခံရခြင်း၊ နေအိမ်ဗုံးပေါက်ကွဲခြင်းများ ဖြစ်ပွားနေသောကြောင့် ပေါင်းတည်မြို့နယ်မှ ရပ်ကျေးအုပ်ချုပ်ရေးမှူး ဦးရေ ၂၀ ကျော် နုတ်ထွက်လာကြကြောင်း သိရသည်။
“ အုပ်ကြီးတွေနုတ်ထွက်ကုန်ကြပြီ ။ မြို့ပေါ်ရပ်ကွက်နဲ့ ကျေးရွာအုပ်ကြီးတွေ ၂၀ကျော်မယ် ။ ကျန်းမာရေးအကြောင်းပြချက်နဲ့ ထွက်ကြတာ၊ မနေ့က အောက်တိုဘာ ၂၅ရက်နေ့က ဆိုရင် ပျူစောထီး ဒလန် တစ်ယောက် အပစ်ခံရတယ်။ ပြီးခဲ့တဲ့ ရက်ပိုင်းတွေမှာလည်း အုပ်ကြီးတွေ သေနတ်နဲ့ ပစ်သတ်ခံရတယ်”ဟု ပေါင်းတည်မြို့ဒေသခံတစ်ဦးမှ ပြောသည်။
အလားတူ ရေတာရှည်မြို့နယ်၊ သက္ကလမြို့နှင့် ပဲခူးမြို့နယ်တို့တွင်လည်း ရပ်ကျေးအုပ်ချုပ်ရေးမှူးများ အများအပြား နုတ်ထွက်နေကြကြောင်း သိရသည်။
“ ရေတာရှည်မြို့မှာက ရေတာရှည် ပြည်သူ့ကာကွယ်ရေးတပ်ဖွဲ့က ရပ်ကျေးအုပ်ကြီးတွေ နုတ်ထွက်ဖို့ ထုတ်ပြန်ပြီးကတည်းက အောက်တိုဘာ ၁၈ ရက်နေ့ ကနေစပြီး နုတ်ထွက်လာကြတာ အယောက်၂၀ကျော်ပြီလေ။ မနုတ်ထွက်ရင်လည်း သေတော့မှာ PDF တွေက တကယ်လုပ်နေတာ ။ သက္ကလမြို့မှာလည်း အဲလိုပဲ ရပ်ကွက်အုပ်ကြီး တစ်ယောက် သေနတ်နဲ့ ပစ်သတ်ခံရပြီး ကျန်တဲ့အုပ်ကြီး ငါး ယောက်လည်း နုတ်ထွက်စာတင်လာကြတယ် ။ ပဲခူးမှာတော့ သုံးယောက်လောက်ပဲ ကြားသေးတယ် နုတ်ထွက်တာ ”ဟု ပဲခူးမြို့ ရပ်မိရပ်ဖတစ်ဦးမှ ပြောသည်။
မြို့နယ်အချို့မှ ရပ်ကျေးအုပ်ချုပ်ရေးမှူးများသည် လက်နက်ကိုင် အစောင့်အရှောက်ယူကာ ၎င်းတို့၏ နေအိမ်တွင် ယင်းတာဝန်ကို ဆက်လက်လုပ်ကိုင်နေကြသည်။
ပဲခူးတိုင်းဒေသကြီးတွင် အကြမ်းဖက်စစ်တပ်၏ ဒေါက်တိုင်များဖြစ်သည့် အစိုးရရုံးများ၊ စစ်ကောက်စီခန့် ဌာနဆိုင်ရာများ၊ အုပ်ချုပ်ရေးမှူးများ၊ စစ်ကောင်စီသတင်းပေးများ၊ရဲနှင့် စစ်သားများကို နည်းလမ်းမျိုးစုံဖြင့် တော်လှန်နေကြသည်။
