သမ္မတရှီကျင့်ဖျင်ဦးဆောင်သောအစိုးရသည် တရုတ်နိုင်ငံအတွင်း လွတ်လပ်စွာပြောဆိုခွင့်ထိန်းချုပ်မှုအပေါ် တင်းကျပ်နေသလို မီဒီယာအဖွဲ့အစည်းများ၌ ရင်းနှီးမြှုပ်နှံမှုကို ပိတ်ပင်တားမြစ်သည့် ရင်းနှီးမြှုပ်နှံမှုဆိုင်ရာ စာရင်းထဲသို့ ထည့်သွင်းခဲ့သည်။

တရုတ်ကွန်မြူနစ်ပါတီ (CCP) ၏ဝက်ဘ်ဆိုက်တွင် တင်ထားသောစီမံချက်အရ နိုင်ငံတော်ဖွံ့ဖြိုးရေးနှင့် ပြုပြင်ပြောင်းလဲရေးကော်မရှင် (SDRC) က မီဒီယာအဖွဲ့အစည်းများတွင် ပုဂ္ဂလိကကဏ္ဍ၏ရင်းနှီးမြှုပ်နှံမှုကို တားမြစ်ရင်းနှီးမြှုပ်နှံမှုစာရင်းသို့ ထည့်သွင်းခြင်းအပေါ် လူထုအမြင်ကိုတောင်းခံပါသည်ဟု သတင်းထုတ်ပြန်ခဲ့ကြောင်း Radio Free Asia ကဖော်ပြသည်။

ရှန်ကျိတက္ကသိုလ်မှ အငြိမ်းစားကထိကတစ်ဦးက "အစိုးရကသူ့ရဲ့သတင်းတွေကိုထိန်းချုပ်ထားပြီး သူ့ ကလောင်ကို အခြားဘယ်သူ့ကိုမှ လွှဲပေးမှာမဟုတ်ဘူးဆိုတာသေချာတယ်၊အရာရာကိုစိုးမိုးဖို့ ခြယ်လှယ်နိုင်တဲ့ အသံလိုချင်နေတာပါ” ဟုဆိုသည်။

အမိန့်ထုတ်ပြန်ချက်တွင်“ပြည်သူပိုင်ကဏ္ဍ ရင်းနှီးမြှုပ်နှံမှုမရှိသော အဖွဲ့အစည်းများသည် သတင်းစုဆောင်းခြင်း၊တည်းဖြတ်ခြင်းသို့မဟုတ်ရုပ်သံထုတ်လွှင့်ခြင်းစသည့်စီးပွားရေးလုပ်ငန်းများတွင် လုပ်ကိုင်ခြင်းမပြုရ” ဟုပါရှိသည်။ အဆိုပါအမိန့်သည် သတင်းအေဂျင်စီများ၊ သတင်းစာဖြန့်ချိရေးအဖွဲ့များ၊ ရေဒီယိုသို့မဟုတ် ရုပ်မြင်သံကြားထုတ်လွှင့်သူများနှင့်အွန်လိုင်းသတင်း၊တည်းဖြတ်ဝန်ဆောင်မှုများ သို့မဟုတ် ထုတ်ဝေသူများကိုပံ့ပိုးပေးသူများ၌ ပုဂ္ဂလိကရင်းနှီးမြှုပ်နှံမှုကို တားမြစ်ရန်ရည်ရွယ်ကြောင်း ဖော်ပြထားသည်။

တရုတ်သည် မီဒီယာများအပြင် နိုင်ငံရေး၊စီးပွားရေး၊စစ်ရေး၊သံတမန်ရေးအဖွဲ့အစည်းများအပါအဝင် နယ်ပယ်များ၌လည်း ပုဂ္ဂလိကရင်းနှီးမြှုပ်နှံမှုများကို ပိတ်ပင်ထားသည်ဟု Radio Free Asia ကဖော်ပြသည်။ တစ်ချိန်တည်းမှာပင် တရုတ်သည်ကမ္ဘာလုံးဆိုင်ရာ ၎င်းတို့ပုံရိပ်ကို တိုးတက်စေရေး မီဒီယာ လွှမ်းခြုံမှုဩဇာလွှမ်းမိုးရန် သိသိသာသာအားထုတ်ခဲ့သည်။

တရုတ်သည် အာဏာတည်မြဲရေးနှင့်နိုင်ငံတကာဆွေးနွေးပြောဆိုချက်များတွင် ၎င်း၏ဇာတ်ကြောင်းကို မြှင့်တင်ရန် မီဒီယာကိုအရေးကြီးသော ကိရိယာတစ်ခုအဖြစ် သုံးနေခဲ့သည်။တရုတ်သည် နေရပ်စွန့်ခွါသွားသော ၎င်းတို့လူမျိုးများအား မျက်ခြည်မပြတ်စောင့်ကြည့်ရင်း ပြည်တွင်းမီဒီယာကို စိစစ်ဖြတ်တောက်လျက် ပြည်ပမှပညာရှင်များ၊ ဂျာနယ်လစ်များနှင့်ကျွမ်းကျင်သူများကို ငွေကြေး ထောက်ပံ့ပေးနေသည်ဟုThe HK Post ကဖော်ပြသည်။