ဂရိနှင့် ပြင်သစ်တို့၏ ကာကွယ်ရေးဆိုင်ရာ သဘောတူစာချုပ်တွင် ပါဝင်သည့် ပြင်သစ်၏ ဖရီးဂိတ် စစ်သင်္ဘောများကြောင့် ဂရိသည် တူရကီထက် ရေတပ်အင်အား ပိုမိုသာလွန်သွားနိုင်ပြီး အရှေ့ မြေထဲပင်လယ်တွင် အင်အားချိန်ခွင်လျှာ အပြောင်းအလဲတစ်ရပ်ကို ဖြစ်လာစေမည်ဟု ကာကွယ်ရေးဆိုင်ရာ လေ့လာသုံးသပ်သူတစ်ဦးက ပြောကြားသည်။
ဂရိနိုင်ငံသည် အောက်တိုဘာ ၇ ရက်က ပြင်သစ်နှင့် ရေးထိုးခဲ့သည့် ကာကွယ်ရေးဆိုင်ရာ သဘောတူစာချုပ်သည် နေတိုးအဖွဲ့ဝင် ၂ နိုင်ငံအကြား ပထမဆုံးရေးထိုးသည့် စာချုပ်ဖြစ်သည်။ ယခုစာချုပ်အရ အဆိုပါ ၂ နိုင်ငံအနေဖြင့် မဟာမိတ်မဟုတ်သည့် နိုင်ငံများမှ တိုက်ခိုက်လာမှုများကို တိုက်ခိုက်ရာတွင် အပြန်အလှန် ကူညီသွားမည်ဖြစ်သည်။
တူရကီနှင့် တင်းမာမှု ပြန်လည်ဖြစ်ပေါ်နေသည့် ဂရိအနေဖြင့် အရှေ့မြေထဲပင်လယ်တွင် ကာကွယ်ရေး စွမ်းရည်ကို မြှင့်တင်ရန် ယခုသဘောတူစာချုပ်အရ ပြင်သစ်ထံမှ စစ်သင်္ဘော ၃ စင်းကို ဝယ်ယူမည်ဖြစ်သည်။
“FDI စစ်သင်္ဘောက ပဥ္စမမြောက် မျိုးဆက် တိုက်ခိုက်ရေးသင်္ဘောအမျိုးအစားဖြစ်ပြီး ရေတပ်အင်အား ကောင်းမွန်စေရေးနှင့် အခက်အခဲ အကျပ်အတည်းစီမံခန့်ခွဲရေးတို့အတွက် ဖြစ်ပါတယ်” ဟု ကာကွယ်ရေးဆိုင်ရာ လေ့လာသုံးသပ်သူ အန်ဒရာ့စ်မောင်ဇူရိုလီယက်စ်၏ ပြောကြားချက်ကို Tehran Times သတင်းဌာနတွင် ဖော်ပြထားသည်။
