အောက်တိုဘာ ၁၂
မုံရွာမြို့မှ ရဲစခန်းတစ်ခုအား ယမန်နေ့ညပိုင်းတွင်း ကာကွယ်ရေးတပ်က လက်ပစ်ဗုံးဖြင့်ပစ်သွင်းရာ စစ်ကောင်စီတပ်ဖွဲ့ဝင်နှစ်ဦးသေဆုံးသွားသည်ဟု ဒေသခံများအပြောအရသိရသည်။
South Monywa PDF အဖွဲ့က အမှတ် (၂) ရဲစခန်းကို လက်ပစ်ဗုံးပစ်ပြီးနောက် ရဲစခန်းက သေနတ်ဖြင့် လေးချက် ရမ်းသန်းပစ်ခတ်ခဲ့သည်ဟု ကာကွယ်ရေးအဖွဲ့ဘက်ကပြောသည်။
“မနေ့က ည ၁၁ နာရီမှာ ကျွန်တော်တို့ South Monywa PDF က အမှတ်(၂)ရဲစခန်းကို လက်ပစ်ဗုံးအစစ်နဲ့ ပစ်သွင်းတိုက်ခိုက်ခဲ့တာပါ။ စစ်ကောင်စီတပ်ဖွဲ့ဝင်နှစ်ဦးသေပါတယ်။ ထိခိုက်ဒဏ်ရာရရှိမှု အသေးစိတ် အခြေအနေကိုတော့ မသိရသေးပါဘူး။ ကျွန်တော်တို့ ရဲဘော်တစ်ဦးကတော့ မတော်တဆ ခြေထောက် ပွန်းပဲ့ဒဏ်ရာ ရသွားပါတယ် မစိုးရိမ်ရပါဘူး’’ ဟု South Monywa PDF မှ တာဝန်ရှိသူတစ်ဦးက ပြောသည်။
South Monywa- PDF သည် အောက်တိုဘာလ ၁၀ ရက် ညပိုင်းကလည်း မုံရွာမြို့၏ အဓိကကျသည့် နေရာများတွင် အသံဗုံးများ လိုက်လံဖောက်ခွဲခဲ့ပြီး ယင်းအသံများသည် ပြည်သူတစ်ရပ်လုံး၏ တော်လှန်ရေး ကြွေးကြော်သံများ ဖြစ်သကဲ့သို့ စစ်ခွေး၊ ရဲခွေးများအတွက် မရဏ(သေခြင်း)ရှေ့ပြေးနိမိတ် အသံများ ဖြစ်၍ အသံဗုံးစစ်ဆင်ရေးကို ညတိုင်းပြုလုပ်သွားမည်ဖြစ်ကြောင်း ယင်းအဖွဲ့ထံမှ သိရသည်။
