အောက်တိုဘာ ၇
နေပြည်တော်၊ ပုဗ္ဗသီရိမြို့နယ်အတွင်းရှိ ဘူးလက်လှဆွေ၏ နေအိမ်အား အောက်တိုဘာလ ၄ရက်က ပြည်သူ့ကာကွယ်ရေးတပ်ဖွဲ့(နေပြည်တော်)မှ ဗုံးဖြင့် တိုက်ခိုက်ခဲ့ကြောင်း အဆိုပါအဖွဲ့က ယမန်နေ့ အောက်တိုဘာလ ၆ရက်တွင် ထုတ်ပြန်ထားသည်။
"ကျွန်တော်တို့ သတိပေးရုံပဲ လုပ်ခဲ့တာဗျ။ ခြံထဲကိုလက်ပစ်ဗုံးပစ်ထည့်ပြီးတော့ ဘာတွေထိခိုက်သွားလဲတော့ မသိဘူး" ဟု ပြည်သူ့ကာကွယ်ရေးတပ်ဖွဲ့ (နေပြည်တော်)မှ မဇ္ဇျိမကိုပြောသည်။
အောက်တိုဘာလ ၅ ရက် နေ့လည် ၁၂ နာရီအချိန်ခန့်ကလည်း နေပြည်တော်၊ ဇဗ္ဗူသီရိမြို့နယ်ရှိ လူဝင်မှုကြီးကြပ်ရေး၊ ပြည်သူ့အင်အားဝန်ကြီးဌာန၏ Non CDM ဝန်ထမ်းကြိုပို့ ဖယ်ရီကို ၎င်းတို့အဖွဲ့က အဝေးထိန်းစနစ်ဖြင့် ဖောက်ခွဲခဲ့သေးသည်။
ထပ်မံပြီး အောက်တိုဘာလ ၅ ရက်နေ့ ညနေ ၅ နာရီခန့်တွင် နေပြည်တော်၊ ပျဥ်းမနား၊ အလယ်ချောင်းအုပ်စု၊ တောင်မြင့်ရေပူရွာအနီး အင်အား ၂၀ ဝန်းကျင်ဖြင့် တပ်စွဲထားသော စစ်ကောင်စီတပ်ကို ဒေသအခေါ် (မကေသီဂိတ်)၌ ပြည်သူ့ကာကွယ်ရေ းတပ်ဖွဲ့(နေပြည်တော်)မှ ရှောင်တခင်ဝင်တိုက်ခိုက်ရာ ခြောက်ဦးထက်မနည်း သေဆုံးခဲ့ကြောင်း သိရသည်။
ထိုနေ့ ညနေတွင်ပင် နေပြည်တော် ဇဗ္ဗူသီရိမြို့နယ်ရှိ CID (မှုခင်းတပ်ဖွဲ့)ရုံးအား အမည်မဖော်လိုသူ တော်လှန်ရေးတပ်ဖွဲ့အင်အားစုမှ အပြင်းစားဖောက်ခွဲမှုတစ်ခုပြုလုပ်ရာ ရဲအရာရှိ လေးဦး ထိခိုက်ဒဏ်ရာရရှိခဲ့သည်။
