အောက်တိုဘာ ၆
အရှေ့တောင်အာရှနိုင်ငံများသည် ယခုလကုန်ပိုင်းတွင် ကျင်းပသွားရန် ရှိနေသည့် အာဆီယံထိပ်သီးအစည်းအဝေးသို့ မြန်မာအာဏာသိမ်းခေါင်းဆောင် မင်းအောင်လှိုင်ကို မဖိတ်ကြားဘဲ ဖယ်ထုတ်ထားရေးအတွက် ဆွေးနွေးလျက်ရှိကြောင်း ဒေသဆိုင်ရာသံတမန်တစ်ဦးက အောက်တိုဘာ ၆ ရက်တွင် ပြောသည်။
အရှေ့တောင်အာရှနိုင်ငံများအသင်း (အာဆီယံ) နှင့်အကြား ဧပြီလက သဘောတူထားခဲ့သည့် ဘုံသဘောတူညီချက် ငါးချက်နှင့်ပတ်သက်ပြီး မြန်မာအာဏာသိမ်းစစ်အုပ်စုဘက်က ပူးပေါင်းဆောင်ရွက်ရန် ပျက်ကွက်မှုက “ပေးထားသည့် ကတိစကား ပြန်ရုပ်ပြီး နောက်ကြောင်းပြန်လှည့်သည့် သဘောသက်ရောက်နေ” ကြောင်း မြန်မာနိုင်ငံဆိုင်ရာ အာဆီယံအထူးကိုယ်စားလှယ်ဖြစ်သည့် အာရီဝမ် ယူဆွတ်ဖ်က သတင်းစာရှင်းလင်းပွဲတစ်ခုတွင် ပြောသည်။
ထိန်းသိမ်းခံထားရသည့် ဒေါ်အောင်ဆန်းစုကြည်နှင့် တွေ့ဆုံရန် ၎င်း၏ တောင်းဆိုမှုများကို မြန်မာအာဏာသိမ်းစစ်အုပ်စုက အဖြေမပေးခဲ့ဟု ဘရူနိုင်း ဒုတိယနိုင်ငံခြားရေးဝန်ကြီးလည်း ဖြစ်သည့် အာရီဝမ်က ပြောသည်။
ပြီးခဲ့သည့် အောက်တိုဘာ ၄ ရက် အာဆီယံနိုင်ငံခြားရေးဝန်ကြီးများ အွန်လိုင်းအစည်းအဝေးတစ်ခုတွင်လည်း မြန်မာအာဏာသိမ်းစစ်ကောင်စီဘက်က ပူးပေါင်းဆောင်ရွက်ရန် ပျက်ကွက်နေမှုအပေါ် စိတ်ပျက်ရကြောင်း ထုတ်ဖော်မှုများ ရှိခဲ့သည်။
မလေးရှားနိုင်ငံခြားရေးဝန်ကြီး ဆိုင်ဖူဒင် အဗ္ဗဒူလာက တွစ်တာကနေတဆင့် ပြောကြားရာတွင် “စစ်ကောင်စီ ဥက္ကဋ္ဌကို အာဆီယံထိပ်သီးအစည်းအဝေး၌ တက်ခွင့်ပြုရန်မှာ ခက်ခဲလိမ့်မည်” ဟု ပြောခဲ့သည်။
