အမေရိကန်၊ တက္ကဆက်ပြည်နယ်လေဆိပ်တစ်ခုတွင် အမေရိကန်အရာရှိများက တရုတ်ကျောင်းသားတစ်ဦးအား စစ်ဆေးမေးမြန်းခြင်းနှင့် ပြည်နှင်ဒဏ်ပေးခြင်းကို တရုတ်က ဆန့်ကျင်ကန့်ကွက်ကြောင်း ထုတ်ဖော်ပြောကြား ခဲ့သည်။
ဟူစတန်မြို့ရှိနယ်စပ်ဝင်ပေါက်တွင် တရုတ်ကျောင်းသားတစ်ဦး စစ်ဆေးမေးမြန်းခံရပြီးနောက် ယင်းကိစ္စ ထွက်ပေါ်လာခြင်းဖြစ်သည်။
နာရီအနည်းငယ်ကြာစုံစမ်းစစ်ဆေးမှုအပြီးတွင် ထိုကျောင်းသားသည် အမေရိကန်မှ နှင်ထုတ်ခံလိုက်ရကြောင်း အမေရိကန်ရှိ တရုတ်သံရုံးမှသတင်းအချက်အလက်ကို ကိုးကားပြီး Global Times က ဖော်ပြခဲ့သည်။
အမေရိကန်၏ လုပ်ဆောင်ချက်သည် ကျောင်းသား၏ တရားဝင်အခွင့်အရေးနှင့် အကျိုးစီးပွားများကို ချိုးဖောက်ပြီး သူနှင့်သူ၏မိသားစုအားပြင်းထန်သောရုပ်ပိုင်းဆိုင်ရာနှင့် စိတ်ပိုင်းဆိုင်ရာထိခိုက်စေခဲ့သည်ဟု တရုတ်သံရုံးက ဆိုသည်။
ကျောင်းသားများ၏ လူ့အခွင့်အရေးကိုဆိုးရွားစွာချိုးဖောက်နေသည်ဟုစွပ်စွဲကာ အလားတူ မတရားစစ်ဆေးမှု၊ ကြမ်းတမ်းသောမေးမြန်းမှုများလည်း ယခင်က အများအပြားရှိခဲ့ဖူးပြီး အမေရိကန်အရာရှိများက တရုတ် ကျောင်းသားများကိုပြည်နှင်ဒဏ်ပေးသည် များရှိခဲ့သည်ဟု သံရုံးက ကန့်ကွက်ခဲ့သည်။
"နိုင်ငံသားအချင်းချင်း အပြန်အလှန်သွားလာခြင်းသည် တရုတ်-အမေရိကန်ဆက်ဆံရေး၏ လူမှုအခြေခံအုတ်မြစ်ဖြစ်သည်။ အမေရိကန်ရှိ တရုတ်ကျောင်းသားများသည် နှစ်နိုင်ငံအကြား အပြန်အလှန် နားလည်မှုနှင့် ချစ်ကြည် ရင်းနှီးမှုကိုမြှင့်တင်ရာတွင် အပြုသဘောဆောင်သောအခန်းကဏ္ဍမှ ပါဝင်ခဲ့သည်” ဟု သံရုံးက ဆက်လက်ဆိုသည်။
တရုတ်ကျောင်းသားများအား သံရုံးက ကြိုဆိုသည့် ထုတ်ပြန်ချက်ကို လေးစားရန် အမေရိကန်အား တရုတ်က တိုက်တွန်းခဲ့ပြီး အမျိုးသားလုံခြုံရေးကိုအကြောင်းပြ၍ အလွဲသုံးစားလုပ်ခြင်းကို ရပ်တန့်ရန်တောင်းဆိုခဲ့သည်။
အမေရိကန်နှင့် တရုတ်တို့သည် ကုန်သွယ်ရေး၊ ကိုဗစ်-၁၉၊ လူ့အခွင့်အရေးပြဿနာများနှင့် Quad နှင့် Aukusကဲ့သို့သော အုပ်စုဖွဲ့ခြင်းများ အပါအဝင် ကိစ္စပေါင်းများစွာတွင် အငြင်းပွားနေခဲ့သည်။