စက်တင်ဘာ ၁၅
၂၀၂၀ အထွေထွေရွေးကောက်ပွဲရလဒ်အပေါ် မြန်မာနိုင်ငံသားများ နှင့်အတူ ပြတ်ပြတ်သားသား ရပ်တည်ကြောင်းကို မြန်မာနိုင်ငံဆိုင်ရာ ပြင်သစ်သံရုံးက ယနေ့ စက်တင်ဘာ ၁၅ ရက် နံနက်ပိုင်းတွင် လူမူကွန်ရက်ကတဆင့် သဘောထားထုတ်ပြန်လိုက်သည်။
"မြန်မာနိုင်ငံ၌ ဒီမိုကရေစီလုပ်ငန်းစဉ်များပြန်လည်ထူထောင်ရေးကို ပြင်သစ်နိုင်ငံသည်တောင်းဆိုပြီး၊ ၂၀၂၀ ခုနှစ် နိုဝင်ဘာ (၈)ရက် အထွေထွေရွေးကောက်ပွဲ၌ ထုတ်ဖော်ပြသခဲ့သော မြန်မာနိုင်ငံသားများ၏ ဆန္ဒမဲများနှင့် ပြတ်ပြတ်သားသားရပ်တည်သည် " ဟု မြန်မာနိုင်ငံဆိုင်ရာ ပြင်သစ်သံရုံးက ဆိုသည်။
ထို့ပြင် ယနေ့ စက်တင်ဘာ ၁၅ ရက်သည် အပြည်ပြည်ဆိုင်ရာ ဒီမိုကရေစီနေ့ ဖြစ်သည့်အပြင် လူအခွင့်အရေး ၊ လွတ်လပ်မှုမြှင်တင့်ရေးနှင့် ဒီမိုကရေစီတန်ဖိုးများကို ပြင်သစ်နိုင်ငံက ထောက်ခံကြောင်း ထပ်လောင်းပြောဆိုသည်။
အမျိုးသားညီညွတ်ရေးအစိုးရ ကိုယ်စားပြုအနေ ဖြင့် ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် အဖြစ် သံအမတ်ကြီး ဦးကျော်မိုးထွန်းက ကုလသမဂ္ဂအထွေထွေညီလာခံ ဖွင့်ပွဲ နှင့် ပိတ်ပွဲ အစည်းအဝေးများကို တတ်ရောက်ကြောင်း သတင်းများ ထွက်ပေါ်လာခဲ့ပြီးနောက် ပြင်သစ်နိုင်ငံက ယခုလို သတင်းထုတ်ပြန်ခဲ့ခြင်းဖြစ်သည်။
