ကိုဗစ် ကူးစက်မှုတွေဖြစ်ခဲ့တဲ့ ထိုင်းနိုင်ငံမှာ  ကပ်ရောဂါဆိုင်ရာ တင်းကျပ်တဲ့ ကန့်သတ်ချက်တွေ ၃ လနီးပါးချမှတ်ထားရာက ဘန်ကောက်မြို့တော်မှာ ဈေးဝယ်ကုန်တိုက်ကြီးတွေ၊ စာသင်ကျောင်းတွေနဲ့ စားသောက်ဆိုင်တွေ  ပြန်ဖွင့်လိုက်ပါတယ်။ COVID-19 ကပ်ရောဂါ ကာကွယ်ထိန်းချုပ်ရေးအဖွဲ့က သြဂုတ်လ ၂၇ ရက်နေ့မှာ ထုတ်ပြန်လိုက်တဲ့ ကြေငြာချက်အရ စားသောက်ဆိုင်တွေမှာလည်း လူအကန့်အသတ်နဲ့ ဝင်ရောက်စားသုံးခွင့်ပြုလိုက်ပါတယ်။ ရောဂါပိုးကူးစက်နိုင်ခြေများတဲ့ ပြည်နယ်၂၉ ခုက အလှပြင်ဆိုင်တွေ၊ ဆံပင်ညှပ်ဆိုင်တွေ နဲ့ အနှိပ်ခန်းတွေအပြင် အားကစားကွင်းတွေကိုပါ ပြန်ဖွင့်ခွင့်ပြုလိုက်တာပါ။ စီးပွါးရေးလုပ်ငန်းရှင်တွေအနေနဲ့လည်း သူတို့ဝန်ထမ်းတွေကို ကာကွယ်ဆေးအပြည့်ထိုးပေးဖို့နဲ့ ပုံမှန် ရောဂါပိုးစစ်ဆေးတာတွေလုပ်ဖို့ တိုက်တွန်းထားပါတယ်။