မန္တလေးတိုင်းဒေသကြီး၊ မြင်းခြံမြို့နယ် အမှတ် ၂၀ ချောင်းဒေါင်းရပ်ကွက်တွင် အုပ်ချုပ်ရေးမှူးဟောင်း၊ ပရဟိတအသင်းဥက္ကဌဖြစ်သူ ဦးကိုနီ၏သားဖြစ်သူနှင့် ၎င်း၏ညီဖြစ်သူအား ယမန်နေ့ဩဂုတ် ၃၁ ရက်ည ၈ နာရီ၀န်းကျင်တွင် စစ်ကောင်စီမှပစ်သတ်ခဲ့ရာသားဖြစ်သူသေဆုံးသွားကြောင်းဒေသခံများထံကသိရသည်။
"ဦးကိုနီက ၅၀၅ (က) အတပ်ခံထားရတော့ရှောင်နေတာ သူ့ကို လက်ရှိတာ၀န်ရှိတဲ့ဗျူဟာမှူးက ၅၀၅ (က) ဖြုတ်ပြီးညှိပေးမယ် အသင်းမှာတာ၀န်ပြန်ထမ်းဆောင်ပါဆိုပြီးခေါ်တဲ့အခါ သူပြန်လာတဲ့အချိန်မှာ မနေ့ညကသူ့အိမ်ထဲကို ဆိုင်ကယ် လေးစီးနဲ့ အရပ်၀တ်သေနတ်ကိုင်ထားတဲ့သူတွေက သူ့သားနဲ့သူ့ညီကိုတစ်ယောက်တစ်ချက်စီပစ်သတ်တာ သားကတော့မြင်းခြံဆေးရုံမှာတင်ဆုံးသွားတယ်၊ ညီဖြစ်သူကတော့လက်ရှိ operation ၀င်ထားရတယ် ဦးနီကတော့အိမ် ပြန်မရောက်သေးလို့ ကံကောင်းလို့လွတ်သွားတယ်"ဟုဒေသခံတစ်ဦးကမဇ္ဈိမကိုပြောသည်။
အဆိုပါဥက္ကဌသည် စစ်ကောင်စီတပ်အာဏာမသိမ်းခင်ကာလက မြင်းခြံမြို့နယ်အမှတ်(၂၀)၏ ရပ်ကွက်အုပ်ချုပ်ရေးမှူးဟောင်းဖြစ်ကာ အာဏာသိမ်းပြီးကာလ၌ တာ၀န်ကိုဆက်လက်ထမ်းဆောင်ရန်စစ်ကောင်စီမှတာ၀န်ပေးခဲ့သော်လည်းငြင်းဆန်ခဲ့ပြီး CDM လုပ်သောကြောင့် ၅၀၅ (က)ပုဒ်မ တပ်ခံထားရသူဖြစ်သည်။
ထို့ကြောင့် စစ်ကောင်စီတပ်ဖွဲ့၀င်များမှ၎င်း၏နေအိမ်သို့၀င်၍ပစ်ခတ်ခဲ့ခြင်းဖြစ်ပြီး အဆိုပါအရပ်၀တ်ဖြင့်ပစ်ခတ်သွားသူများမှာ အခင်းဖြစ်သည့်နေအိမ်အပါအ၀င် ဘေးပတ်၀န်းကျင်ရှိနေအိမ်များထံမှ လက်ကိုင်ဖုန်း ၆ လုံးယူဆောင်သွားကြောင်းဒေသခံများက ဆိုသည်။
