မန္တလေးတိုင်းလွှတ်တော်ဥက္ကဌ ဦးအောင်ကျော်ဦး နေအိမ်နှင့် ထိုအိမ်တွင်ဖွင့်ထားသည့် အမျိုးသားဒီမိုကရေစီ အဖွဲ့ချုပ် (NLD) ရုံးကို ဩဂုတ် ၂၉ရက် ည ၁၁ နာရီခန့်တွင် စစ်ကောင်စီအဖွဲ့ဝင်များက ဝင်ရောက်ဖျက်ဆီးသွားခဲ့သည်။
"သူတို့က ညက တံခါးတွေဖျက်ဝင်လာတယ်။ သူတို့ထဲကတစ်ယောက်က ဒီထဲမှာ မိန်းမသားတွေပဲရှိတယ်ဆိုပြီးပြောသံကြားလိုက်တယ်။ ဒါကို နောက်တစ်ယောက်က မရဘူးဆိုပြီးဖျက်ဝင်တာ၊ အိမ်အတွင်းပိုင်းကို ဖျက်ဆီးပြီး Laptop တွေ ဖုန်းတွေ ယူသွားတယ်" ဟု ပါတီဝင်တစ်ဦးက မဇ္ဈိမသို့ပြောသည်။
၈၉ လမ်း၊ ၃၅-၃၆ ကြား မဟာအောင်မြေမြို့နယ် ဒေးဝန်းအရှေ့တွင်ရှိသောရုံးသို့ အာဏာသိမ်းတပ်လာရောက်ဖျက်ဆီးအပြီး မိနစ်အနည်းငယ်အတွင်း ရုံးရှေ့တွင် ဗုံးပေါက်ကွဲခဲ့မှုထပ်မံဖြစ်ပေါ်ခဲ့သည်။ ယင်းပေါက်ကွဲမှုသည် မည်သူ၏ လက်ချက်ဖြစ်ကြောင်း လက်ရှိအချိန်ထိ မသိရှိရသေးသော်လည်း ပျူစောထီးတို့လက်ချက်ဟု ပါတီအသိုင်းအဝိုင်းက ယုံကြည်နေကြသည်။
ဦးအောင်ကျော်ဦးနှင့်သူ၏သားဖြစ်သူသည် စစ်အာဏာသိမ်းပြီးနောက်ပိုင်းတွင် အဖမ်းခံထားရသည်။
အကြမ်းဖက်စစ်တပ်က ဦးအောင်ကျော်ဦး၏ ချွေးမနှင့် အိမ်ရှိသူများ ရိုက်နှက်ကာ တပ်ဆင်ထားသည့် CCTVကိုလည်း ဖြုတ်ယူသွားခဲ့ကြောင်းလည်း သိရသည်။
