ဩဂုတ် ၂၂
အောင်ဘာလေထီလုပ်ငန်းကို အပြီးတိုင်ဖျက်သိမ်းကြောင်း အမျိုးသားညီညွတ်ရေးအစိုးရ၏ စီမံကိန်း၊ဘဏ္ဍာရေးနှင့် ရင်းနှီးမြှပ်နှံမှုဝန်ကြီးဌာနက သြဂုတ် ၂၁ ရက် ညပိုင်းတွင် ထုတ်ပြန် ကြေညာခဲ့သည်။
အပြီးတိုင် ဖျက်သိမ်းလိုက်သည့်အတွက် လက်ကားဝယ်ကာ ပြန်လည်ရောင်းချနေသော ထီလုပ်ငန်းရှင်ကြီးများအနေဖြင့် အောင်ဘာလေထီလက်မှတ်များကို ဝယ်ယူ၊ ရောင်းချ၊ဖြန့်ဖြူးခြင်း မပြုကြရန် သတိပေး တားမြစ်ထားသည်။
ထုတ်ပြန်ချက်တွင် လောင်းကစားဥပဒေအား ပထမအကြိမ် ပြင်ဆင်သည့် ဥပဒေကို သြဂုတ် ၆ ရက်က ပြည်ထောင်စုဥပဒေ အမှတ်( ၅ )ဖြင့် အတည်ပြု ပြဌာန်းခဲ့သည်ဟု ပါဝင်သည်။ ယင်း ပြင်ဆင်ပြဌာန်းသည့် ဥပဒေ၏ ပုဒ်မ (၂ ) ပုဒ်မခွဲ(ည)တွင် ထီ ဆိုသည်မှာ အမျိုးသားညီညွတ်ရေးအစိုးရ၏ စီမံကိန်း၊ဘဏ္ဍာရေး နှင့်ရင်းနှီးမြှပ်နှံမှုဝန်ကြီးဌာန ပြည်တွင်းအခွန်များ ဦးစီးဌာန က ဖွင့်လှစ်သည့် အောင်လံလွှင့်ချီ နွေဦးထီကိုသာ ဆိုလိုကြောင်း ပါရှိသည်။
အကြမ်းဖက်စစ်ကောင်စီ၏ တရားမဝင် လောင်းကစားလုပ်ငန်းဖြစ်သည့် အောင်ဘာလေ ထီလက်မှတ်များအား ထီလုပ်ငန်းရှင်များက ဝယ်ယူရောင်းချ ဖြန့်ဖြူးခြင်း မပြုလုပ်ရန် NUGက တားမြစ်ထားသည်။
ဖောက်ဖျက်ကျူးလွန်သည့် ထီလုပ်ငန်းရှင်ကြီးများအား တည်ဆဲဥပဒေများနှင့်အညီ အရေးယူဆောင်ရွက်သွားမည်ဟု စီမံကိန်း၊ဘဏ္ဍာရေးနှင့် ရင်းနှီးမြှပ်နှံမှုဝန်ကြီးဌာန ပြည်ထောင်စုဝန်ကြီး ဦးတင်ထွန်းနိုင်က ကြေညာချက်ထုတ်ပြန်ခဲ့ခြင်းဖြစ်သည်။
