သြဂုတ်လ ၁၉ ရက်
မန္တလေးတိုင်း၊ မိုးကုတ်မြို့နယ် ကျောက်ပုတ်ကျေးရွာနှင့် မြေမဲရွာအကြား ကျောက်ပုတ်-မြေမဲလမ်းမှ လမ်းမြေအရှည် ပေ ၂၀၀ကျော်သည် ယနေ့နံနက်ပိုင်းက ပြိုကျပျက်စီးသွားကြောင်း သိရသည်။
တောင်ပေါ်လမ်းဖြစ်သည့် အဆိုပါလမ်းသည် တောင်အိကျလာခြင်းကြောင့် အရှည် ပေ ၂၀၀ ကျော်မှာ လူသွားမရအောင် ပျက်စီးသွားကြောင်း ဒေသခံတစ်ဦးက ဆိုသည်။
" ဒီလမ်းက အက်ရာပေးနေတာ နှစ်နှစ်လောက်ရှိပြီ။ အဲဒီတုန်းက သွားလို့ရသေးတယ်။ ခုက သွားမရအောင်ကို အိကျ ပျက်စီးသွားတယ် "ဟု ယင်းဒေသခံက ပြောသည်။
တောင်ပေါ်လမ်းဖြစ်သည့်အပြင် တောင်အောက်တွင်လည်း ယခင်က ကျောက်မျက်တူးဖော်သည့် မြေလုပ်ကွက်များရှိခဲ့သည်။
လမ်းအရှည် ပေ ၂၀၀ ကျော် ပျက်စီးသွားသည့် အဆိုပါလမ်းသည် အောက်ဘက်သို့ အနက် ၈ပေ ဝန်းကျင်အထိ အိကျသွားခြင်း ဖြစ်သည်။
ကျောက်ပုတ် - မြေမဲလမ်း ပျက်စီးသွားသော်လည်း ဒေသခံများအနေဖြင့် ဘော်ဗဒန်းလမ်းမှ သွားနိုင်သည်ဟု သိရသည်။
" ဘော်ဗဒန်းလမ်းကနေ သွားရမယ်။ အဲဒီလမ်းကလည်း ပြိုထားတာ မကြာသေးဘူး။ ဒါပေမဲ့ ခဲတွေနဲ့ မြေလမ်းလုပ်ထားတော့ လူသွားလို့ရနေပြီ။ အခုတော့ အဲဒီလမ်းကနေ ပတ်သွားရမယ် "ဟု ဒေသခံတစ်ဦးက ဆိုသည်။
ယခု ပျက်စီးသွားသည့်လမ်းသည် အကျယ် ၁၀ ပေဝန်းကျင်သာ ရှိပြီး ကျောက်ပုတ်ရွာ၊ မြေမဲရွာ၊ ပြောင်းပြင်ရွာနှင့် ကျပ်ပြင်ကျေးရွာအထိ သွား၍ရသည့်လမ်း ဖြစ်သည်။
