ရင်းနှီးမြှုပ်နှံသူတစ်ဦးက ကုမ္ပဏီ၏ လုံလောက်သော အစုရှယ်ယာများကို ဝယ်ယူ၍ လုပ်ငန်းဆိုင်ရာ ဆုံးဖြတ်ချက်များကို ချမှတ်နိုင်သည့်နည်းလမ်း (VIE) ၏ အားနည်းချက်များကို အသုံးပြုကာ တရုတ်ကုမ္ပဏီများက ဆယ်စုနှစ်များစွာ ပြည်ပရင်းနှီးမြှုပ်နှံသူများထံမှ အကျိုးအမြတ်များကို ရယူလျှက်ရှိသည်။

ရင်းနှီးမြှုပ်နှံသူများသည် လုပ်ငန်းတစ်ခုမှ စတော့ကို ဝယ်ယူသည့်အခါ ကုမ္ပဏီ၏ ရာခိုင်နှုန်းတစ်ခုကို ဝယ်ယူခြင်း ဖြစ်သော်လည်း Nasdaq နှင့် New York Stock Exchange စာရင်းဝင် ကုမ္ပဏီများက ယင်းသို့ လုပ်ဆောင်ခြင်း မရှိဟု CNN သတင်းဌာနက ဖော်ပြသည်။

ပြည်ပရင်းနှီးမြှုပ်နှံသူများထံမှ အကျိုးအမြတ်ယူရာတွင် VIE စနစ်တွင် အဖွဲ့အစည်း ၂ ခုကို အသုံးပြုသည်။ ပထမတစ်ခုမှာ တရုတ်နိုင်ငံ ပြင်ပရှိ များသောအားဖြင့် အနောက်ကာရေဘီယံ ပင်လယ်အတွင်းရှိ ကေမန်းကျွန်းများရှိ အမည်ခံတစ်ခုခုကို အသုံးပြုသည်။ ဒုတိယတစ်ခုမှာ နိုင်ငံတွင်း စီးပွားရေးလုပ်ကိုင်ရန် လိုင်စင်ရယူထားသည် တရုတ်ကုမ္ပဏီတစ်ခုခုဖြစ်သည်။ ယင်းအဖွဲ့အစည်း ၂ ခုကို စာချုပ်စာတမ်း အမျိုးမျိုးဖြင့် ချိတ်ဆက်ထားသည်။

VIE စနစ်အသုံးပြုသည့် ကုမ္ပဏီတစ်ခုတွင် ပြည်ပရင်းနှီးမြှုပ်နှံသူများက ရှယ်ယာဝယ်ယူသည့်အခါ ၎င်းတို့က ပြည်ပအမည်ခံကုမ္ပဏီတွင် စတော့ဝယ်ယူသည် တရုတ်နိုင်ငံတွင်းမှ စီးပွားရေးလုပ်ငန်းတွင် ဝယ်ယူခြင်းမဟုတ်ကြောင်း CNN သတင်းတွင် ဖော်ပြသည်။

နည်းပညာကုမ္ပဏီအပါအဝင် ပြည်တွင်းလုပ်ငန်းများ၌ အစုရှယ်ယာပိုင်ဆိုင်ရန် ပြည်ပရင်းနှီးမြှုပ်နှံသူများကို ခွင့်ပြုမထားသောကြောင့် တရုတ်ကုမ္ပဏီများအနေဖြင့် VIE စနစ်ကို ၁၀ စုနှစ်များစွာ အသုံးပြုကြရသည်။ သို့သော် တရုတ်ကုမ္ပဏီများအနေဖြင့် ပြည်ပမှ ငွေကြေးများကိုလည်း လိုချင်နေသေးသည်။

အခြားကုမ္ပဏီများတွင် အစုရှယ်ယာပိုင်ဆိုင်ထားသည့် အများပိုင် ပြည်ပကုမ္ပဏီတစ်ခုကို ထူထောင်ခြင်းဖြင့် တရုတ်ကုမ္ပဏီများသည် စည်းမျည်းစည်းကမ်းများကို ကျော်လွှားရှောင်ရှားနိုင်ကြသည်။

တရုတ်နိုင်ငံ၏ စီးပွားရေးကို အားကောင်းစေသည့် ကုမ္ပဏီများနှင့် အမေရိကန်ရင်းနှီးမြှုပ်နှံသူများ လွယ်ကူစွာ လုပ်ဆောင်နိုင်သောကြောင့် ဝေါစထရိနှင့် အမေရိကန်၏ စည်းကမ်းကြပ်မတ်ရေးအရာရှိများက ယင်းကဲ့သို့ လုပ်ကိုင်သည့်စနစ်အပေါ် များစွာ တင်းကြပ်ခြင်း မရှိခဲ့ပေ။

သို့သော် ကြီးမားသည့် အန္တရာယ်များ ရှိနေသည်။ ပထမအချက်မှာ ပြည်ပမှ ရင်းနှီးမြှုပ်နှံသူများက တရုတ်ကုမ္ပဏီများမှ ရရှိသည့် စီးပွားရေးအကျိုးအမြတ်များကို ခံစားစေနိုင်သည့် စာချုပ်များ၏ တရားဝင်မှုမှာ ရှင်းလင်းခြင်းမရှိပေ။ VIE အစီအစဉ်သည်လည်း တရုတ်ဥပဒေအရ တရားဝင်မှုတွင် မရှင်းလင်းပေ။

တရုတ်ကုမ္ပဏီများသည် တရုတ်နိုင်ငံသားများ ၁၀၀ ရာခိုင်နှုန်းပိုင်ဆိုင်သည်ဟု တရုတ်အစိုးရကို တင်ပြထားသော်လည်း ယင်းကုမ္ပဏီများကပင် ၎င်းတို့၏ ပြည်ပအစုရှယ်ယာရှင်များအား ကုမ္ပဏီများကို အမှန်တကယ်ပိုင်ဆိုင်သူများသည် အဆိုပါ ရှယ်ယာရှင်များသာ ဖြစ်ကြောင်း ပြောကြားထားသည်။

တရုတ်နှင့် အမေရိကန် အာဏာပိုင်နှစ်ဖက်စလုံးက အဆင်ပြေစေမည့် ချဉ်းကပ်မှုတစ်ခုကို ၁၀ စုနှစ်များစွာ ကျင့်သုံးလာပြီးနောက် ၎င်းတို့အနေဖြင့် VIE နှင့် ပတ်သက်၍ ကသိကအောက်ဖြစ်စရာ အခြေအနေများကို မြင်တွေ့လာရသည်။

အမေရိကန် ငွေချေးသက်သေခံလက်မှတ်လုပ်ငန်း ကြီးကြပ်ရေးကော်မရှင်အကြီးအကဲ ဂါရီဂန်ဆလာက ဇူလိုင် ၃၀ ရက်က စည်းမျဉ်းသစ်များ ထုတ်ပြန်ခဲ့ရာတွင် တရုတ်ကုမ္ပဏီများအနေဖြင့် အကျိုးအမြတ်ဆို်ငရာ အန္တရာယ်များနှင့် ပတ်သက်၍ အမေရိကန်ရင်းနှီးမြှုပ်နှံသူများအား ပိုမိုရှင်းပြရန် လိုအပ်ကြောင်း ဖော်ပြထားသည်။

“ရင်းနှီးမြှုပ်နှံသူအများအပြားက သူတို့အစုရှယ်ယာပိုင်ဆိုင်မှုဟာ တရုတ်အခြေစိုက် ကုမ္ပဏီတစ်ခုမှာမဟုတ်ဘဲ အမည်ခံကုမ္ပဏီတစ်ခုမှာသာရှိတယ်ဆိုတာ မသိမှာကို စိုးရိမ်ပါတယ်” ဟု ၎င်းကပြောကြားသည်။