ဩဂုတ် ၈
စစ်ကိုင်းတိုင်းဒေသကြီး ဟုမ္မလင်းမြို့နယ်တွင် စစ်ရေးလှုပ်ရှားနေသည့် စစ်ကောင်စီတပ်ကို ရှမ်းနီအမျိုးသားတပ်မတော်(SNA)ကတိုက်ခိုက်ခဲ့၍ စစ်ကောင်စီတပ်ဖွဲ့ဝင် ၂ဦးသေဆုံးပြီး ၅ဦး ဒဏ်ရာရရှိခဲ့ကြောင်း SNA ပြောရေးဆိုခွင့်ရှိသူ ဗိုလ်မှူးကြီးဆေစိုင်းထွန်းက ပြောသည်။
ဟုမ္မလင်းမြို့နယ် နမ့်တောရွာနှင့် ဟဲဖက်ကျေးရွာအကြား၌ ယနေ့ ဩဂုတ် ၈ရက် နေ့လည်ပိုင်းက တိုက်ခိုက်ခဲ့ခြင်းဖြစ်သည်ဟုဆိုသည်။
“ ဖြစ်စဉ်က သူတို့ စစ်ကောင်စီတပ်တွေက စစ်ကြောင်းဝင်လာတာ။ ဝင်လာတော့ လမ်းတစ်ဝက်မှာ ကြားဖြတ်မိုင်းခွဲတိုက်ခိုက်ခဲ့တာ” ဟု ဗိုလ်မှူးကြီးဆေစိုင်းထွန်းက ပြောသည်။ SNA ဘက်က ထိခိုက်မှုမရှိဟု ၎င်း ကဆိုသည်။
SNAနှင့် စစ်ကောင်စီတပ်တို့သည် ယခုဩဂုတ်လ ၅ရက်ကလည်း ဟုမ္မလင်းမြို့နယ်၌ တိုက်ပွဲဖြစ်ပွားခဲ့သည်။ ထို့ပြင် ဇူလိုင်လနှင့် ဇွန်လတွင်လည်း တိုက်ပွဲအချို့ဖြစ်ပွားခဲ့ကြောင်း ဗိုလ်မှူးကြီးဆေစိုင်းထွန်းက ပြောသည်။
