ဇူလိုင် ၃၁
ရန်ကုန်၊ တောင်ဥက္ကလာပမြို့နယ်၊ ရွှေအိုးဆေးဆိုင်တွင် ဆေးဝယ်ယူရန်တန်းစီနေသည့် ပြည်သူများအား စစ်ကောင်စီတပ်သားများ လာရောက်ဖယ်ရှားခဲ့ကာဆေးဆိုင်ပိတ်သွားသည့်အတွက် လိုအပ်သည့်ဆေးများဝယ်မရဖြစ်ခဲ့ရကြောင်းသိရသည်။
ဒီကနေ့ ဇူလိုင်လ ၃၁ ရက် မနက် ၉ နာရီဝန်းကျင်တွင် စစ်ကားတစ်စီး၊ ရဲကားနှစ်စီးနှင့်လာရောက်ကာ အထက်မှခိုင်းသည်ဆိုကာ ပြန်လွှတ်ခဲ့ကြောင်း ဆေးဝယ်ရန်တန်းစီနေသူတစ်ဦးက ကိုပြောသည်။
“ဆေးဆိုင် Page ကကြေညာတာတွေ့တော့လူတွေအချို့ဆို မနက် ၄ နာရီလောက်ကတည်က တန်းစီနေကြတာ ကျွန်တော် ၅ နာရီရောက်တာတောင် နံပါတ် ၂၀၀ ကျော်မှာစီရတယ်၊ တစ်မှတ်တိုင်ကျော်တယ်လူတန်းကြီးက ဆိုင်ကစာရင်းကောက်ပြီး ၂၇၀ စာလောက်ရမယ်ဆိုပြီးကျွန်တော်တို့စောင့်နေတုန်း ၉ နာရီလောက်မှာရဲတွေစစ်သားတွေ ရောက်လာပြီး ဆေးဆိုင်ကိုပိတ်ခိုင်းပြီးလူစုခွဲလိုက်တာ” ဟုသူကဆိုသည်။
“၆ ပေခွါပြီးစီလဲမရဘူး၊ အထက်ကခိုင်းလိုက်တာ၊ ခင်ဗျားတို့လူစုခွဲရမယ်၊ ပြန်ကြတော့” ဟုစခန်းမှုးဖြစ်ဟန်တူသူ ရဲတစ်ဦးကပြောဆိုနေကြောင်း သတင်းပို့လာသော ရုပ်သံဖိုင်အရသိရသည်။
ပြည်သူများ ဝယ်ယူရန်လာရောက်တန်းစီနေသောဆေးမှာ Enoxaparin သွေးကျဲဆေး(အရပ်ခေါ်) ဖြစ်ပြီး မူရင်းဈေးမှာ မြန်မာငွေ ၁၀၀၀၀ ကျပ်ခန့်ရှိသော်လည်း မှောင်ခိုဈေးကွက်တွင် ၆၀၀၀၀ ခန့်ရှိသည်ဟု သိရသည်။
လက်ရှိအချိန်တွင် ရန်ကုန်မြို့၌ ထိုဆေးရရှိနိုင်သည့် ဆိုင်မရှိသလောက်ရှားနေကြောင်းသိရသည်။
