အိန္ဒိယနိုင်ငံတွင် H5N1 ငှက်တုပ်ကွေးရောဂါကုသမှုခံယူနေသည့် အသက် ၁၂ နှစ်အရွယ် ယောက်ျားလေး တစ်ဦးသည် အိန္ဒိယဆေးဘက်ဆိုင်ရာသိပ္ပံအင်စတီကျူ(AIIMS) တွင် ကွယ်လွန်သွားရာ ၂၀၂၁ခုနှစ်အတွင်း နိုင်ငံတွင်း ပထမဆုံးအကြိမ် ငှက်တုပ်ကွေးရောဂါကြောင့်သေဆုံးခြင်းဖြစ်သည်။

အဆိုပါ ကလေးငယ်သည် AIIM ကလေးအထူးကုဌာနတွင် ဇူလိုင် ၂၀ က သေဆုံးခဲ့ခြင်းသည်။

ဆေးရုံ၏ အဆောင် D5 တွင် ကုသမှုခံယူနေသည့် အသက် ၁၂ နှစ်အရွယ် အဆိုပါ ယောက်ျားလေးသည် ရောဂါစစ်ဆေးပြီးနောက် H5N1 ငှက်တုပ်ကွေးရောဂါ ကူးစက်ခံနေရကြောင်း စစ်ဆေးတွေ့ရှိခဲ့သည်။ ၎င်းသည် အဆုတ်ယောင်နှင့် သွေးကင်ဆာရောဂါလည်းခံစားနေရသည်။

သူသည် ကုသမှုခံယူနေပြီး ဒေလီမြို့ရှိ AIIMS ၏ အထူးကြီးကြပ်ကုသဆောင်သို့ ရောက်ခဲ့ရသည်ဟု AIIMS မှ တာဝန်ရှိသူများက ပြောကြားခဲ့သည်။

“သူနဲ့ ထိတွေ့ခဲ့တဲ့ ဝန်ထမ်းအားလုံးကိုလဲ တုပ်ကွေးရောဂါလက္ခဏာတွေရှိမရှိကို စစ်ဆေးပြီး ရှိခဲ့ရင် အစီရင်ခံစာတင်ရပါမယ်” ဟု AIIMS အရာရှိများက ပြောကြားခဲ့သည်။

၎င်းအား ကုသမှုခံယူစဉ် ကိုဗစ်-၁၉ နှင့် တုပ်ကွေးရောဂါစစ်ဆေးခြင်းကိုလည်း ပြုလုပ်ခဲ့သည်။

"နမူနာဆေးစစ်ချက်အရတော့ ကိုဗစ်-၁၉ကူးစက်ထားတဲ့လက္ခဏာမတွေ့ရပါဘူး။ တုပ်ကွေးရောဂါဖြစ်ပေမယ့် ဘာတုပ်ကွေးမှန်း မသိတာကြောင့် အမျိုးသားဗိုင်းရပ်စ်ဗေဒဌာနမှာ စစ်ဆေးလိုက်တဲ့အခါ H5N1 ငှက်တုပ်ကွေးရောဂါဖြစ်တယ်လို့ သူတို့က အတည်ပြုပါတယ်" ဟု သတင်းရင်းမြစ်က ဆိုသည်။

ရောဂါဖြစ်ပွားမှုအသေးစိတ်ကို အမျိုးသားရောဂါထိန်းချုပ်ရေးစင်တာ (NCDC) သို့ တင်ပြခဲ့ပြီး ယင်းအဖွဲ့က ရောဂါဖြစ်သူနှင့် ထိတွေ့ခဲ့သူများကို ရှာဖွေဆက်သွယ်ခြင်းကိုစတင်ပြုလုပ်ခဲ့ကာ သေဆုံးသူနှင့် တူညီသည့် အလားတူရောဂါလက္ခဏာများထပ်မံဖြစ်ပွားမှုရှိမရှိ စစ်ဆေးခဲ့သည်ဟု သတင်းရင်းမြစ်က ဆိုသည်။