ဇူလိုင် ၂၁
ဂျပန်အစိုးရမှ မြန်မာနိုင်ငံရှိ ကိုဗစ်လူနာများအတွက် Oxygen Concentrator အလုံးရေ ၇ဝဝ ကို ကုလသမဂ္ဂစီမံကိန်းဝန်ဆောင်မှုများရုံး (UNOPS) မှတဆင့် ထောက်ပံ့သွားမည်ဖြစ်ကြောင်း မြန်မာနိုင်ငံရှိ ဂျပန်သံရုံးက ယနေ့ ဇူလိုင်လ ၂၁ ရက်တွင် ထုတ်ပြန်လိုက်သည်။
မြန်မာနိုင်ငံတွင် ယခုနှစ် ဇွန်လကုန်ကတည်းက COVID-19 ရောဂါကြောင့် တစ်နေ့လျှင် လူရာပေါင်းများစွာ သေဆုံးနေခဲ့ပြီး ထိုသို့လျင်မြန်စွာယိုယွင်းလာနေသောအခြေအနေတွင် မြန်မာပြည်သူများအတွက် လိုအပ်သောကုသမှုများပေးနိုင်ရန် ထောက်ပံ့ရခြင်းဖြစ်သည်ဟု ဂျပန်သံရုံးက ထုတ်ပြန်သည်။
Oxygen Concentrator များကို COVID-19 လူနာများကို ကုသပေးနေသော ရန်ကုန်တိုင်းဒေသကြီးအတွင်းရှိ ကုသရေးဌာနများဆီပို့ပေးသွားမည်ဟုဆိုသည်။
ထို့အပြင် ကိုဗစ်လူနာများကို အရေးပေါ်သယ်ယူပို့ဆောင်ရေးအတွက် လူနာတင်ယာဉ် ၁၄ စီး ကိုလည်း နိုင်ငံတဝှမ်းရှိ ကျန်းမာရေးစောင့်ရှောက်မှုစင်တာများကို မကြာမီလွှဲပြောင်းပေးအပ်မည်ဖြစ်ကြောင်း ဂျပန်သံရုံးက ထုတ်ပြန်သည်။
