ဇူလိုင် ၁၈

အိန္ဒိယနိုင်ငံ၏ သံတမန်မူဝါဒသည် စစ်အာဏာသိမ်းမှုခံလိုက်ရသော မြန်မာနိုင်ငံ၏ ပြောင်းလဲနေသော အခြေအနေနှင့် မကိုက်ညီတော့ပေ။

အိန္ဒိယနိုင်ငံ၏ မြန်မာနိုင်ငံဆိုင်ရာမူဝါဒသည် တရုတ်ဗဟိုပြုဝါဒဖြစ်သည်။ အိန္ဒိယနိုင်ငံရေးတွင် BJP ပါတီ နေရာရလာပြီးကတည်းက အိန္ဒိယမူဝါဒရေးဆွဲသူများသည် မြန်မာနိုင်ငံကိုပေကျင်းထံ တွန်းမပို့ရေးဆိုသော အချက်ကိုသာကိုင်စွဲထားခဲ့ကြသည်။ ရာဂျစ်ဂန္ဓီခေတ်က မြန်မာ့ဒီမိုကရေစီလှုပ်ရှားမှုနှင့် အဝေးရောက်အစိုးရကို ထောက်ခံခဲ့သည်မှစကာ အေဘီဗတ်ဂျ်ပါးရီး (A.B. Vajpayee) လက်ထက်တွင် ရခိုင်သူပုန်ခေါင်းဆောင်များကို သတ်ဖြတ်သုတ်သင်ဖို့ အမိန့်ပေးခဲ့သည်အထိဖြစ်ခဲ့သည်။ လက်ရှိ ဖေဖော်ဝါရီလက စစ်တပ်အာဏာသိမ်းအပြီး ပြုလုပ်ခဲ့သည့် ကုလလုံခြုံရေးကောင်စီ အစည်းအဝေးဆုံးဖြတ်ချက်များ ချမှတ်ရာတွင် တရုတ်နှင့် ရုရှားနိုင်ငံ တို့နှင့်အတူ ရပ်တည်ကာ မြန်မာနိုင်ငံဆိုင်ရာဆုံးဖြတ်ချက်များကို အားပျော့ အောင်လုပ်ခဲ့သည်။ အိန္ဒိယမူဝါဒသည် ၃၆၀ ဒီဂရီ လှည့်ပြောင်းခဲ့ပြီဖြစ်သည်။ နယူးဒေလီ၏ မြန်မာနိုင်ငံဆိုင်ရာမူဝါဒမှာ သွက်ချာပါဒလိုက်နေပြီဆိုသည်ကို ယခုအချိန်တွင်တည့်တည့် ပြောရတော့မည်ဖြစ်သည်။ ယင်းကို ကုလသမဂ္ဂအထွေထွေညီလာခံတွင် မြန်မာနိုင်ငံတွင်စစ်အာဏာသိမ်းမှုအားဝိုင်းဝန်းဝေဖန်ရှုတ်ချ သည့်ဆုံးဖြတ်ချက်ချရာတွင် အိန္ဒိယနိုင်ငံကမဲမပေးဘဲ ကြားနေခဲ့ခြင်းက ထင်ရှားသည့် အခြေအနေတရပ်ဖြစ်နေသည်။

ဖေဖော်ဝါရီ ၁ ရက်နေ့အာဏာသိမ်းမှုအပြီးတွင် တရုတ်နိုင်ငံကတော့ အခြေခံအဆောက်အအုံတည် ဆောက်ရေးဆိုင်ရာ မဟာစီမံကိန်းကြီး ၁၅ ခုကိုအရယူသွားခဲ့ပြီဖြစ်သည်။  မြန်မာစစ်တပ်က စစ်ရေးအရ ဝင်ရောက်စွက်ဖက်မှုကို ပိုမိုထောက်ခံခဲ့သည်။ ဇွန်လအစောပိုင်းက ဗိုလ်ချုပ်မှူးကြီးမင်းအောင်လှိုင်နှင့် သူ့နိုင်ငံခြားရေးဝန်ကြီး ဝဏ္ဏမောင်လွင်တို့သည် တရုတ်သံအမတ် ချင်ဟိုင်းအားသွားရောက်တွေ့ဆုံခဲ့သည်။ ထို့နောက်တရုတ်သံရုံးက မင်းအောင်လှိုင်ကို ‘မြန်မာနိုင်ငံ၏ခေါင်းဆောင်’ ဟု ၎င်း၏ လူမှုကွန်ယက် ဖေ့စ်ဘုတ်မှ တစ်ဆင့် ထုတ်ပြန်ချက်တွင် ရည်ညွှန်းဖော်ပြခဲ့သည်။ စစ်တပ်သည် တရုတ်ကိုမယုံသော်လည်း သူတို့၏ထောက်ခံမှုကိုတော့ တန်ဘိုးထားသည် အလေးထားသည်။ မြန်မာနိုင်ငံကိုမဝေဖန်နဲ့ စစ်အစိုးရကို တရုတ်ရင်ခွင်ထဲတွန်းမပို့နဲ့ဟူသော အိန္ဒိယနိုင်ငံ၏ ပုံမှန်ပြောနေကျခုခံချေပချက်သည် အနှစ်မပါဗလာဟင်းလင်းသာဖြစ်သည်။ အဘယ်ကြောင့် ဆိုသော် မြန်မာနိုင်ငံသည် တရုတ်၏ပြုတ်တူသဖွယ် ခိုင်မြဲလှသော လက်ခုပ်တွင်းကျရောက်နေခဲ့ပြီးဖြစ်သောကြောင့်ပင်ဖြစ်သည်။

တပ်နှင့်ထိတွေ့ဆက်ဆံရန် အိန္ဒိယစစ်တပ်က ပြင်းပြင်းထန်ထန်ထောက်ခံသည်။

တပ်က ရခိုင့်တပ်မတော် AA နှင့်နည်းပရိယာယ်ဆိုင်ရာ အပစ်ရပ်သဘောတူညီချက်ရယူထားပြီးဖြစ်သည်။ ဤနည်းဖြင့် အနောက်ဖက်စစ်နံကို လုံခြုံစေကာ မြန်မာနှင့်တရုတ်အကျိုးစီးပွားများကို ကာကွယ်ထားပြီးဖြစ်စေသည်။ ယခုတော့ AA က အိန္ဒိယနိုင်ငံ၏ ကုလားတန်ဘက်စုံစီမံကိန်းအပေါ် အာရုံစိုက်နိုင်ပြီဖြစ်သည်။ ကာလကတ္တား-စစ်တွေ-ပလက်ဝ-မီဇိုရမ် ရေလမ်း၊ ကုန်းလယ်နှစ်သွယ် ချိတ်ဆက်မည့်  ယင်းစီမံကိန်းသည် လုပ်ငန်းရှိကန်ထရိုက်တာများ တိုက်ခိုက်ခံရမှုကြောင့် ရပ်ဆိုင်းလုနီးပါးဖြစ်ခဲ့ရပြီဖြစ်သည်။ AA သည် အိန္ဒိယသံတမန်များနှင့် အဆက်အသွယ်လုပ်လိုသည်။ သို့သော် အိန္ဒိယစစ်တပ်ကိုမယုံပေ။ အိန္ဒိယက တပ်ကို ထောက်ခံအားပေးနေပုံရသည်။

အိန္ဒိယနိုင်ငံ၏ သံတမန်မူဝါဒသည် မြန်မာနိုင်ငံ၏အစဉ်ပြောင်းလဲနေသော ဒိုင်းနမစ်အခြေအနေနှင့်ကိုက် ညီခြင်းမရှိပေ။ အိန္ဒိယမူဝါဒချမှတ်သူများသည် မြန်မာနိုင်ငံတွင်းရှိ သဲသန်ပြင်းထန်လာနေသော ခုခံရေး လှုပ်ရှားမှုများအကြောင်းသိမှသိကြရဲ့လား။ ခိုင်လုံသောသတင်းများအရ စစ်သား ၈၀၀ ကျော်သည် ဒီမိုကရေ စီရေးလှုပ်ရှားသူများနှင့်ပေါင်းစည်းခဲ့ကြပြီဖြစ်သည်။ လူငယ်များနှင့်အလုပ်သမားသမဂ္ဂများက စတင်ခဲ့သော မြန်မာ့တော်လှန်ရေးလှုပ်ရှားမှုသည် မတ်လကုန်သို့ရောက်သောအခါ အလွန်ကြီးမားကျယ်ပြန့်လာခဲ့ပြီဖြစ်ပြီး ဆရာဝန်များ၊ သူနာပြုများ၊ ဘဏ်ဝန်ထမ်းများ၊ ကုန်စုံဆိုင်ပိုင်ရှင်များ၊ ရထားအလုပ်သမားများ နှင့် အခြားသော အသက်မွေးဝမ်းကျောင်းနယ်ပယ်မှ ပညာရှင်များပါဝင်လာခဲ့ပြီဖြစ်သည်။ အစိုးရဝန်ထမ်းအား လုံး၏ ၁၀% မျှရှိသော ကျန်းမာရေးဝန်ထမ်းများ ထောင်ပေါင်းများစွာက အလုပ်ခွင်သို့သွားရန်ငြင်းဆန်ခဲ့ကြသည်။ ကမ္ဘာ့ကပ်ရောဂါအကြီးအကျယ် ကူးစက်ပျံ့ပွားလျက်ရှိသော်လည်း ဆေးရုံအများစုနှင့်ဆေးကျောင်းအ များစုမှာပိတ်ထားဆဲဖြစ်သည်။ ငြိမ်းချမ်းစွာဆန္ဒပြရာတွင်  မိတ်ဆွေများနှင့်ဆွေမျိုးများကို ဆုံးရှုံးခဲ့ရပြီး နောက် ဆန့်ကျင်ရေးလှုပ်ရှားမှုကြီးသည် အကြမ်းဖက်ပုံစံသို့ပြောင်းလဲသွားခဲ့ပြီဖြစ်သည်။ ဆန္ဒပြသူများသည် တိုင်းရင်းသားသူပုန်အခြေခံ စခန်းများဆီသို့သွားကာ လက်နက်ကိုင်သင်တန်းများ တက်နေကြပြီဖြစ်သည်။ မြန်မာနိုင်ငံတဝှမ်းမှပြည်သူလူထုကြီးကလည်း စစ်တပ်နှင့်ယင်း၏ ကုမ္ပဏီလုပ်ငန်းစုကြီးများက ထုတ်လုပ်သည့် မြန်မာဘီယာနှင့် Joox music app  တို့လို ထုတ်ကုန်များကိုသပိတ်မှောက်နေကြပြီဖြစ်သည်။ မြန်မာပြည်စစ်အာဏာသိမ်းမှုကို ဝေဖန်ရှုတ်ချခြင်းမပြုလုပ်ခဲ့သည့် တရုတ်နှင့်စင်္ကာပူမှ ထုတ်ကုန်များကိုလည်း အလားတူသပိတ်မှောက်နေကြပြီဖြစ်သည်။

ရန်ကုန်နှင့်အနီးတဝိုက်ရှိ တရုတ်စက်ရုံ ၃၆ ရုံ မီးရှို့ဖျက်ဆီးခံရပြီးနောက်တွင်တော့ တရုတ်ကလည်း ယင်း တို့အတွက် ရွေးလမ်းများကို ပြန်လည်သုံးသပ်နေပြီဖြစ်သည်။ အလားတူပင် ရခိုင်-ယူနန် ရေနံနှင့်ဓတ်ငွေ့ ပိုက်လိုင်းကို စောင့်ကြပ်နေသည့် ရဲအစောင့်များလည်း အလားတူတိုက်ခိုက်သတ်ဖြတ်ခံခဲ့ရသည်။ အရှေ့အ လယ်ပိုင်းမှရေနံနှင့် မြန်မာနိုင်ငံမှသဘာဝဓတ်ငွေ့ကို တရုတ်နိုင်ငံသို့တင်ပို့နေသည့် အဆိုပါပိုက်လိုင်းကို ဖောက်ခွဲဖျက်ဆီးပစ်မည်ဟု ခုခံဆန့်ကျင်ရေးလှုပ်ရှားမှုတွင် ပါဝင်သူများက ခြိမ်းခြောက်ခဲ့ကြသည်။ နယူး ဒေလီမှာ ပိုနေမြဲကျားနေမြဲသမားများကလည်း အိန္ဒိယဒီမိုကရေစီကို သူတို့၏စံတန်ဘိုးအဖြစ်မှတ်ယူနေ ကြသည့် မြန်မာလူငယ်များအား ဆက်လက်ပြီးကင်းကင်းကွာကွာနေကြဦးမှာလား။

သို့သော်အနောက်နိုင်ငံများက လုပ်သမျှ အကုန် လိုက်လုပ်ရမည်ဆိုသည်ကတော့ ဉာဏ်နုံနဲ့ရာရောက်ပါသည်။ တားဆီးပိတ်ဆို့မှုများသည် ဆင်းရဲသားများနှင့် အားနွဲ့သူများကိုအလွန်အမင်းထိခိုက်စေသည်မှတပါး အလုပ် မဖြစ်ပါ။ ထို့ကြောင့်ယခုအချိန်သည် အိန္ဒိယနိုင်ငံအတွက် ဂန္ဒီ ငြိမ်းချမ်းရေးမစ်ရှင်ကို မြန်မာနိုင်ငံသို့ယူ ဆောင်သွားရမည့်အချိန်ပင်ဖြစ်သည်။ ယင်းသည်သာ တပ်မတော်၊ ဒီမိုကရေစီပါတီများ၊ အဝေးရောက်အစိုးရ နှင့် တိုင်းရင်းသားသူပုန်အဖွဲ့တို့အကြား အဓိပ္ပါယ်ရှိသောဆွေးနွေးပွဲများကို အထမြောက်အောင်လုပ် ဆောင်ပေးနိုင်လိမ့်မည်ဖြစ်သည်။

ဒီမိုကရေစီလှုပ်ရှားမှုနှင့် သူပုန်အဖွဲ့များအတွက်တော့ တရုတ်နှင့် အာဆီ ယံအဖွဲ့အပေါ်ယုံကြည်အားထားမှုပျောက်ဆုံးသွားခဲ့ပြီဖြစ်သည်။ အလားတူပင်တပ်မတော်ကလည်း အနောက်နိုင်ငံများအပေါ်အယုံအကြည်မရှိပေ။ ဘင်္ဂလားဒေ့ရှ်စစ်တပ်အကြီးအကဲ ဗိုလ်ချုပ်ကြီး  မိုအင်းယူ အာမက် (General Moeen U. Ahmed) အတွက် ပရာနတ်မူကာဂျီး (Pranab Mukherjee) ၂၀၀၈ ကလုပ်ပေး ခဲ့သလို နယူးဒေလီကလည်း ဗိုလ်ချုပ်မှူးကြီးမင်းအောင်လှိုင်အတွက် ဂုဏ်သိက္ခာရှိသောထွက်ပေါက် ရ အောင်လုပ်ပေးနိုင်ခဲ့လျှင် မြန်မာနိုင်ငံ၏နုနယ်သေးသော ဒီမိုကရေစီကိုပြန်လည်အသက်သွင်းနိုင်ပါလိမ့်မည်။ ထို့နောက်တွင် ဂန္ဓီ ငြိမ်းချမ်းရေးမစ်ရှင်ကလည်း အလုံးစုံပြီးပြည့်စုံသော ဆွေးနွေးပွဲကို ပြန်လည်စတင် ခြင်းဖြင့် ဖက်ဒရယ်ပြည်ထောင်စုအခြေခံပေါ်တွင် ပြန်လည်လုပ်ငန်းစတင်နိုင်ပါလိမ့်မည်။ ဇိုးရမ်းထန်းငါ သည် ဂန္ဓီ ဝါဒီမဟုတ်ပါ။ မြန်မာနိုင်ငံနှင့်ဟိုဘက်ဒီဘက်အဆက်အသွယ်ရှိသောသူမျိုးကိုသူမှတဆင့်ရရှိနိုင် ပြီး အဓိပ္ပာယ်ရှိသောဆွေးနွေးပွဲပေါ်ပေါက်လာအောင်လုပ်ဆောင်နိုင်ပါလိမ့်မည်။ မြန်မာ့အရေးအတွက် ဆောင်ရွက်ခြင်းသည် အိန္ဒိယနိုင်ငံ၏ အရှေ့ဆောင်မူဝါဒ (Act East policy)အောင်မြင်ရေးအတွက်သော့ချက်  ဖြစ်သည်။

(The Telegraph Online  တွင် သတင်းစာဆရာ Subir Bhaumik ရေးသားသည့် ဆောင်းပါးကို စီလျော်အောင် ဘာသာပြန်ထားခြင်းဖြစ်သည်)