ဇူလိုင် ၁၀
တရုတ်နိုင်ငံနှင့် နယ်စပ် နမ့်ခမ်းမြို့တွင် ကိုဗစ်ပိုးတွေ့လူနာများပြားလာပြီးနောက် စစ်ဘေးရှောင်စခန်းများကို အဝင်အထွက် ကန့်သတ်ထားသည်။
" စစ်ရှောင်စခန်းမှာက ပိုးတွေ့သူမရှိသေးဘူး။ အချိန်မီတားဆီးနိုင်အောင် စခန်းအဝင်အထွက်ကို ကန့်သတ်ထားတယ်။ မနက် ဆယ်နာရီကနေ ညနေ သုံးနာရီအတွင်း ဝင်ထွက်ခွင့် မပေးဘူး။ အဲ့ကာလကျော်ရင် ဈေးဝယ်ဖို့ တာဝန်ခံတစ်ဦးစီပဲ ထွက်ရမယ်" ဟု နမ့်ခမ်းမြို့ နေဝန်းနီစစ်ရှောင်စခန်းမှ တာဝန်ခံတစ်ဦးက ပြောသည်။
နမ့်ခမ်းမြို့တွင် ဇူလိုင် ၈ ရက်ညအထိ ကိုဗစ်ပိုးတွေ့လူနာ နှစ်ရာကျော်ရှိနေပြီး ဒေသခံလူမှုရေးအဖွဲ့များ၏ စာရင်းအရ သေဆုံးသူ ကိုးဦးရှိနေပြီဖြစ်သည်။ ပိုးတွေ့လူနာများ ရှိနေသည့် ရပ်ကွက်သုံးခုကိုလည်း Lockdown ချထားသည်။
" နမ့်ခမ်းဆေးရုံက ကုတင် ၁၀၀ ဆန့်။ လူနာက ၂၀၀ ကျာ်သွားပြီ။အပြင်မှာ မဏ္ဍပ်ထပ်ထိုးရပြီ" ဟု ကိုဗစ်လူနာများအား ကူညီပေးနေသူတစ်ဦးကပြောသည်။
နမ့်ခမ်းမြို့သည် ကချင်ပြည်နယ် မန့်ဝိန်းကြီးနှင့် မူဆယ်မြို့နှင့် ထိစပ်နေသလို တရုတ်နှင့် နယ်စပ်မြို့လည်း ဖြစ်သည်။ မူဆယ်မြို့တွင်လည်း ကိုဗစ်ပိုးတွေ့လူနာ သုံးရာကျော်ရှိလာပြီး အောက်ဆီဂျင်အိုး အလုံအလောက်မရ၍ အခက်တွေ့နေသည်ဟု ဒေသခံလူမှုရေးအဖွဲ့များကပြောသည်။