ပါကစ္စတန်နိုင်ငံတွင် တရုတ်ဆက်သွယ်ရေးကုမ္ပဏီများက တပ်ဆင်ထားသည့် လုပ်ငန်းများကို ဘလူချီစတန် လွတ်မြောက်ရေးတပ်(BLA)က မီးရှို့လိုက်ပြီး ဝန်ထမ်း ၆ ယောက်ကိုလည်း ပြန်ပေးဆွဲခဲ့သည်။

တရားဝင်ကြေညာချက်တွင် လွတ်လပ်ရေးလိုလားသည့် အဖွဲ့အစည်းမှ ပြောရေးဆိုခွင့်ရှိသူ အဇတ်ဒ် ဘလူချ် က ဖမ်းဆီးရမိသော အလုပ်သမားများ၏ အမည်များကို ထုတ်ဖော်ပြောဆိုခဲ့သည်။

ကွာတာမြို့ခံ ဂူခန်၊ အာဒီနှင့် မက်ချ်ရာ့ဂျ်အမည်ရှိ ယောကျာ်းသုံးဦး ကို ဖမ်းဆီးခဲ့သည့် နေ့တွင်ပင် ပြန်လွှတ်ပေးခဲ့သော်လည်း သံသယရှိသည့် အခြားသူများကို BLA က ဆက်လက် ဖမ်းဆီးထားသည်။

“ ဂျီနီဗာမှာရှိတဲ့ ကြက်ခြေနီအဖွဲ့က ကိုယ်စားလှယ်များအပါအဝင် ကုလသမဂ္ဂနဲ့ အခြားအပြည်ပြည်ဆိုင်ရာ အဖွဲ့အစည်းတွေက ထိန်းသိမ်းထားတဲ့ အလုပ်သမားတွေ ပြန်လွှတ်ပေးဖို့အတွက် အာမခံသူတွေ အဖြစ်ဆောင်ရွက်ပေးပြီး ၎င်းတို့အနေနဲ့ အခုလို အမြတ်ထုတ်တဲ့ စီမံကိန်း နဲ့ ပါကစ္စတန်စစ်တပ်ရဲ့ သူလျှိုကွန်ရက်ကို ပြန်လည်အသက်မသွင်းဘူးလို့ အာမခံရင် သူတို့ကို လွှတ်ပေးပါမယ် ” ဟု အဇတ်ဒ် ဘလူချ်က ပြောကြားခဲ့သည်။

ကုလသမဂ္ဂနှင့် အခြားအပြည်ပြည်ဆိုင်ရာအဖွဲ့အစည်းများအနေဖြင့် BLA ၏ တောင်းဆိုချက်များကို တုံ့ပြန်ရန်အတွက် အချိန် ၁၀ ရက်ကို ယင်းအဖွဲ့က ပေးထားသည်။

'' ဒီလိုမှမဟုတ်ဘူးဆိုရင်တော့ ဖမ်းဆီးခံရတဲ့လူတွေကို ဘလူချ် အမျိုးသားတရားရုံးမှာ စည်းကမ်းမလိုက်နာမှုနဲ့ ရုံးတင်တရားစွဲသွားမှာပါ'' ဟု BLA ပြောရေးဆိုခွင့်ရှိသူက ထပ်မံပြောကြားခဲ့သည်။

BLA က သိမ်းပိုက်ထားသည့် ဘလူချီစတန်ရှိ တယ်လီဖုန်းဆက်သွယ်ရေးကုမ္ပဏီများအား နယ်ချဲ့အင်အားကြီး နိုင်ငံများ (ပါကစ္စတန်နှင့်တရုတ်) ၏ နယ်မြေချဲ့ထွင်ရေး ရည်မှန်းချက်များတွင် ကူညီပံ့ပိုးသူအဖြစ် မဆောင်ရွက်ရန် အကြိမ်ကြိမ်သတိပေးခံခဲ့ရသည်ဟုလည်း BLA ကဆိုသည်။

တရုတ်က ပါကစ္စတန်နှင့် ပူးပေါင်း၍ တယ်လီကွန်ဆက်သွယ်ရေးကွန်ရက်တစ်ခုကိုထူထောင်ခဲ့ပြီး ယင်းကို ဘလူချီစတန်ရှိ လူများ၏လှုပ်ရှားမှုကို စုံစမ်းရန်နှင့် ခြေရာခံရန် ဟွာဝေးနှင့် လက်ခွဲကန်ထရိုက် ကုမ္ပဏီများဖြစ်သော Netcom၊ Exeleron၊ ZTE တို့ အပါအဝင်အခြားဆက်သွယ်ရေးကုမ္ပဏီများကို အသုံးပြုနေသည်။