ဇူလိုင် ၈
နော်ဝေ တယ်လီကွန်း အော်ပရေတာ Telenor (တယ်လီနော) သည် မြန်မာနိုင်ငံရှိ ယင်း၏ လုပ်ငန်းများကို လက်ဘနွန် ရင်းနှီးမြှုပ်နှံမှုကုမ္ပဏီ M1 Group ထံ ဒေါ်လာ ၁၀၅ သန်းဖြင့် ရောင်းချလိုက်ကြောင်း Telenor က ဇူလိုင် ၈ ရက်တွင် ပြောသည်။
“မြန်မာနိုင်ငံမှာ မကြာသေးတဲ့ ကာလအတွင်း ဖြစ်ပျက်ခဲ့တာတွေနဲ့ အခြေအနေတွေ ထပ်မံ ယိုယွင်းဆိုးရွားလာတာတို့က ကုမ္ပဏီရဲ့ ရင်းနှီးမြှုပ်နှံမှု ရုပ်သိမ်းဖို့ ဆုံးဖြတ်ချက်ကို ဖြစ်လာစေခဲ့တဲ့ အခြေခံ ဖြစ်ခဲ့ပါတယ်” ဟု Telenor က ထုတ်ပြန်သည်။
Telenor သည် ဖေဖေါ်၀ါရီ ၁ ရက် စစ်အာဏာသိမ်းမှုနောက်တွင် ယင်း၏ မိုဘိုင်းဆက်သွယ်ရေးလုပ်ငန်း၌ အကြီးအကျယ် ကန့်သတ်ခံရမှု ကြုံခဲ့ရပြီးနောက် ပြီးခဲ့သည့် မေလက ယင်း၏ မြန်မာလုပ်ငန်းကို အရှုံးစာရင်းပြခဲ့ကာ နော်ဝေ ခရိုနာ ၆ ဒသမ ၅ ဘီလီယံ (ဒေါ်လာ ၇၅၂ သန်း) ရှိ ၎င်းတို့၏ လုပ်ငန်းများကို ထည့်သွင်းတွက်ချက်မှု မလုပ်ခဲ့ပေ။
ယခု အရောင်းအ၀ယ်အရ Telenor ၏ မြန်မာနိုင်ငံရှိလုပ်ငန်း၏ လုပ်ငန်းတန်ဖိုးကို ဒေါ်လာ သန်း ၆၀၀ ခန့်ဖြင့် တန်ဖိုးဖြတ်ခြင်းနှင့် ညီမျှပြီး M1 Group ထံ ရောင်းချမှုက လုပ်ငန်းများကို ဆက်လက်လည်ပတ်စေရေး အာမခံမည်ဖြစ်ကြောင်း Telenor ၏ အမှုဆောင်အရာရှိချုပ် Sigve Brekke က ပြောသည်။
“ပြီးခဲ့တဲ့ လတွေအတွင်း မြန်မာနိုင်ငံက အခြေအနေတွေက တယ်လီနောအတွက်ရော၊ ပြည်သူတွေရဲ့ လုံခြုံရေးအတွက်၊ စည်းမျဥ်းထိန်းသိမ်းမှုနဲ့ လိုက်နာရမှုဆိုင်ရာ အကြောင်းရင်းတွေအတွက်ပါ ပိုမို တိုးမြင့်စိန်ခေါ်လာနေခဲ့ပါတယ်” ဟု Sigve Brekke က ပြောခဲ့သည်။
