စစ်ကောင်စီရဲ့ အကြမ်းဖက်အာဏာသိမ်းတဲ့ လုပ်ရပ်ကို လက်မခံနိုင်တဲ့ နိုင်ငံ့ဝန်ထမ်းအများအပြားဟာ အာဏာဖီဆန်ခြင်းဆိုတဲ့ CDM လှုပ်ရှားမှုကို ပြုလုပ်ခဲ့ကြတာကြောင့် စစ်ကောင်စီရဲ့ အကြပ်ကိုင်ခြိမ်းခြောက်ဖမ်းဆီးခြင်းကို ခံခဲ့ရတဲ့အတွက် ယခုအချိန်မှာ လွတ်မြောက်နယ်မြေတွေထဲကို ထွက်ပြေးတိမ်းရှောင်နေရသူတွေ အများအပြားရှိလာပါတယ်။
ဒီလို လွတ်မြောက်နယ်မြေတွေကို ထွက်ပြေးတိမ်းရှောင်ကြတဲ့ CDM ဝန်ထမ်းတွေအနက် ဆရာ/ဆရာမတွေနဲ့ အခြားဌာနဆိုင်ရာက ဝန်ထမ်း ၅၀ ကျော်လောက်က KNU တပ်မဟာ ၆ က နယ်မြေတခုမှာ ကျောင်းသား/ကျောင်းသူနဲ့ လူငယ်တွေကို အခြေခံပညာအပြင် လူမှုဘဝတွေမှာ လက်တွေ့အသုံးချနိုင်တဲ့ ပညာရပ်တွေကို သင်ကြားပေးနေတယ်လို့ သိရပါတယ်။
KNU လွတ်မြောက်နယ်မြေမှာ ပညာသင်ကြားပေးနေတဲ့ CDM ဆရာမ ဒေါ်ခိုင်သင်းမွန်ကို မဇ္ဇျိမက ဆက်သွယ်ပြီး သူတို့လုပ်ဆောင်နေမှုတွေကို မေးမြန်းထားပါတယ်။