ဇွန် ၃၀
မတရားဖမ်းဆီးခံ ရန်ကုန်တက္ကသိုလ်ကျောင်းသားတဦးဖြစ်သူ ကိုဘုန်းထက်နောင်သည် အင်းစိန်ထောင်မှ ယနေ့ဇွန်လ ၃၀ ရက်နေ့ညနေပိုင်းမှာ ပြန်လည်လွတ်မြောက်လာကြောင်းသိရသည်။
အာဏာသိမ်းစစ်အုပ်စုက အကျဉ်းထောင်များမှ ဖမ်းဆီးထိန်းသိမ်းခံ အကျဉ်းသား ၂၃၄၂ ဦးအား ဒီကနေ့ဇွန်လ ၃၀ ရက်တွင် လွှတ်ပေးခဲ့ရာမှာ ကိုဘုန်းထက်နောင် ပါဝင်ဝင်လွတ်မြောက်လာခဲ့ခြင်းဖြစ်သည်။
ရန်ကုန်တက္ကသိုလ်ကျောင်းသား ကိုဘုန်းထက်နောင် သည် မတ်လ ၃ ရက်နေ့က ရန်ကုန်မြို့၊ တာမွေစစ်အာဏာရှင်ဆန့်ကျင်ဆန္ဒပြမှုတွင် ဖမ်းဆီးခြင်းကို ခံရပြီး နိုင်ငံတော်အကြည်ညိုပျက်စေမှုပုဒ်မ ၅၀၅(က)နဲ့ တရားစွဲဆိုခံခဲ့ရသည်။
ဖမ်းဆီးခံရပြီး အင်းစိန်ထောင်ကို စတင်ရောက်ရှိခဲ့တဲ့ တပတ်အတွင်းမှာပင် ကိုဘုန်းထက်နောင်၊ ကိုအောင်ဖုန်းမော်၊ ကိုဝေယံဖြိုးမိုးနဲ့ ကိုသုတစိုးတို့ကို စစ်ကြောရေးပို့ပြီး ၃၊ ၄ ရက်ကြာ ညှင်းပန်းနှိပ်စက်ခံခဲ့ရပါသည်။
ဖမ်းဆီးခံရပြီး ၂ လအကြာတွင် ကိုဘုန်းထက်နောင်၊ ကိုအောင်ဖုန်းမော်၊ ကိုလေပြေစိုးမိုး၊ ကိုဝေယံဖြိုးမိုး၊ ကိုဇော်ထက်နိုင်၊ ကိုသုတစိုးတို့ကို ထောင်အာဏာပိုင်တွေက တနေရာစီခွဲထားခဲ့ခြင်းဖြစ်သည်။
ကိုလေပြေစိုးမိုးနဲ့ ကိုဇော်ထက်နိုင်တို့ကို အစာငတ်ခံဆန္ဒပြရန် ဦးဆောင်သည်ဟု စွပ်စွဲပြီး ထောင်အာဏာပိုင်တွေက ၃ ညအိပ် ၄ ရက် တိုက်ပိတ်ခဲ့ကြသည်။ ကျောင်းသားတက်ကြွလှုပ်ရှားသူများဖြစ်သည့် ကိုအောင်ဖုန်းမော်၊ ကိုလေပြေစိုးမိုး၊ ကိုဝေယံဖြိုးမိုး၊ ကိုဇော်ထက်နိုင်၊ ကိုသုတစိုးတို့သည် ဒီကနေ့လွတ်မြောက်ခဲ့သူများတွင် မပါဝင်ခဲ့ပေ။
ကိုဘုန်းထက်နောင်သည် အင်းစိန်ထောင်တွင် ရက်ပေါင်း ၁၂၀ ကျော်ကြာ ဖမ်းဆီးချုပ်နှောင်ခံရပြီးနောက် ယခုလိုပြန်လည်လွတ်မြောက်လာခြင်းဖြစ်သည်။
