ဇွန် ၂၉
ရန်ကုန်တိုင်းဒေသကြီး သင်္ကန်းကျွန်း မြို့နယ် ဂဖူးကွေ့ ဈေးတွင် အင်္ဂါနေ့ မနက် ၇နာရီကျော်က ရပ်ကွက်အုပ်ချုပ်ရေးမှူးတစ်ဦး သေနတ်ဖြင့်အပစ်ခံရ၍ သေဆုံးသွားကြောင်း မျက်မြင်တွေ့ရှိသူများအပြောအရ သိရသည်။
သေဆုံးသွားသည့် အမျိုးသားမှာ င/ကရပ်ကွက် နဝရတ်လမ်းသွယ်တွင် နေထိုင်သူ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီဝင် ဦးစိန်လှိုင်ဝင်း (ခ) ကျားကြီးဖြစ်ပြီး ဂဖူးကွေ့ဈေးတွင် ငါးရောင်းသူ ဖြစ်သည်ဟု သိရသည်။
" သူကကြံ့ခိုင်ရေးကရပ်ကျေးဥက္ကဌပါ။ ဆန္ဒပြ သူတွေကိုဖမ်းတဲ့ထဲသူပါတယ်လို့ ပြောတာကြားရတယ်။ သူတို့ မိသားစုအကုန်ငါးရောင်းတာ။ တပ်မတော် ထောက်ခံပွဲတွေဘာတွေမိသားစုလိုက်သွားကြတယ်'' ဟု အိမ်နီးချင်းတစ်ဦးက မဇ္ဈိမသို့ပြောသည်။
" သေနတ်နဲ့အပစ်ခံရပြီး နေရာမှာတင် ဆုံးသွားတာပါ။ ရုတ်ရုတ်သဲသဲဖြစ်သွားတော့လေ ဘယ်သူက ဘယ်လိုဖြစ်တယ်တောင် သေချာမသိလိုက်ရဘူး''ဟု သူက ဆက်ပြောသည်။