ယခုနှစ်တွင် အွန်လိုင်းမှ တစ်ဆင့် ကျင်းပမည့် ကမ္ဘာ့ကျန်းမာရေး ညီလာခံအား ထိုင်ဝမ်ပါဝင်ခွင့်မရစေရန် တရုတ်ကွန်မြူနစ်ပါတီ (CCP) တာဝန်ရှိသူများက ဖိအားပေး နှောက်ယှက်မှုများကို ထိုင်ဝမ်၏ ပြည်မရေးရာကောင်စီ (MAC) က ကန့်ကွက်ရှုတ်ချလိုက်သည်။
“သမိုင်းကြောင်းအရသော်လည်းကောင်း၊ နိုင်ငံတကာ ဥပဒေအရသော်လည်းကောင်း၊ ရေလက်ကြားတည်ရှိမှု အနေအထားရအရသော်လည်းကောင်း ထိုင်ဝမ်ဟာ တရုတ်ပြည်သူ့ သမ္မတနိုင်ငံ(PRC) ရဲ့ အစိတ်အပိုင်းတစ်ခု မဟုတ်ပါဘူး၊ တရုတ်ကွန်မြူနစ်ပါတီရဲ့ တစ်ဖက်သတ်ချမှတ်ထားတဲ့ ‘တရုတ်တစ်နိုင်ငံတည်း မူဝါဒ’ ကို ဘယ်တုန်းကမှ လက်မခံခဲ့ပါဘူး” ဟု ထုတ်ပြန်ချက်တွင် ဖော်ပြထားသည်။
“ကုလသမဂ္ဂအထွေထွေ ညီလာခံနဲ့ ကမ္ဘာ့ကျန်းမာရေးအဖွဲ့ချုပ် (WHO) တို့ရဲ့ သတ်မှတ်ချက်တွေကို CCP က ပျက်ပြားအောင် လုပ်နေပါတယ်။ ထိုင်ဝမ်ကို သေးသိမ်အောင်လုပ်ခြင်းနဲ့ နိုင်ငံတကာအသိုင်းအဝိုင်းက နားလည်မှု လွဲစေအောင် လုပ်ခြင်းကြောင့် ထိုင်ဝမ်ပြည်သူတွေရဲ့ လွတ်လပ်ခွင့်ကို အနှောက်အယှက် ဖြစ်စေပါတယ်။ ဒီလို တာဝန်မဲ့တဲ့ လုပ်ဆောင်ချက်တွေဟာ နှစ်ဖက်ဆက်ဆံရေးကို ထိခိုက်စေပါတယ်”ဟုလည်း ပါရှိသည်။
“ကမ္ဘာ့နိုင်ငံတွေက ကိုဗစ်-၁၉ကပ် ရောဂါကို အာရုံစိုက်နေသလို နိုင်ငံတကာ အသိုင်းအဝိုင်းကလည်း WHA မှာ ထိုင်ဝမ်ရဲ့ ပါဝင်မှုကို ထောက်ခံနေချိန်မှာ တရုတ်က ဟန့်တား နှောက်ယှက်တာဖြစ်ပါတယ်”ဟု ထုတ်ပြန်ထားသည်။
တရုတ်အစိုးရ၏ ခြိမ်းခြောက်မှုနှင့် ဖိအားတို့ကို ထိုင်ဝမ်က ဂရုစိုက်မည်မဟုတ်ကြောင်းလည်း ကောင်စီက ကြေညာထားသည်။
