မေ ၃၀
ဘရာဇီးနိုင်ငံမှာ ကိုဗစ်-၁၉ ကပ်ရောဂါ ကိုင်တွယ်ဖြေရှင်းမှုနဲ့ပတ်သက်လို့ သမ္မတ ဂျဲရ် ဘော်လ်ဆွန်နာရိုကို ဆန့်ကျင်ဆန္ဒပြမှုတွေ မေလ ၂၉ ရက်မှာ ထပ်မံပေါ်ပေါက်ခဲ့ပြီး အဲဒီဆန္ဒပြပွဲတွေမှာ လူသောင်းချီ ပါ၀င်ခဲ့ကြပါတယ်။
ဘရာဇီးနိုင်ငံမှာတော့ ကိုဗစ်-၁၉ ကပ်ရောဂါကြောင့် လူပေါင်း ၄၆၁,၀၀၀ ကျော် သေဆုံးထားခဲ့ပါတယ်။
ရီယိုဒီဂျနေးရိုးမြို့လယ်မှာတော့ လူပေါင်း ၁၀,၀၀၀ လောက်ဟာ နှာခေါင်းစည်းတွေ တပ်ထားလျက်နဲ့ မြို့ထဲလမ်းတွေမှာ ချီတက်ခဲ့ကြပြီး “ ဘော်လ်ဆွန်နာရို လူမျိုးတုန်းသတ်မှု” နဲ့ “ဘော်လ်ဆွန်နာရိုဗိုင်းရပ်စ် အဝေးကို ထွက်သွားစမ်း” ဆိုပြီး ကြွေးကြော်အော်ဟစ်ခဲ့ကြပါတယ်။
အခြား အဓိကမြို့ကြီးတွေမှာလည်း အလားတူ စုရုံးချီတက်မှုတွေ ပေါ်ပေါက်ခဲ့ပြီး သမ္မတ ဘော်လ်ဆွန်နာရိုအပေါ် ခုလိုမျိုး အမျက်ဒေါသထွက်မှုလှိုင်းဟာ ပြီးခဲ့တဲ့ လတွေအကြာကတည်းက စတင်ပေါ်ပေါက်နေခဲ့တာ ဖြစ်ပါတယ်။
အမေရိကန်ပြီးရင် ဘရာဇီးဟာ ကမ္ဘာပေါ်မှာ ကိုဗစ်-၁၉ ကြောင့် သေဆုံးသူဦးရေ ဒုတိယအများဆုံး နိုင်ငံလည်း ဖြစ်ပါတယ်။
ကိုဗစ်-၁၉ ကပ်ရောဂါ ဖြစ်ပွားမှု အစပိုင်းတုန်းက လက်ယာယိမ်းသမ္မတ ဘော်လ်ဆွန်နာရိုက ကိုရိုနာဗိုင်းရပ်စ်ကို “တုပ်ကွေးအသေးစား” တစ်ခုသာဖြစ်ကြောင်း ပြောဆိုခဲ့ပါတယ်။
ဒါ့အပြင် နိုင်ငံမှာ ကိုရိုနာဗိုင်းရပ်စ်ကြောင့် သေဆုံးသူဦးရေ တဖြည်းဖြည်းချင်း မြင့်တက်လာခဲ့ပေမယ့် ဘော်လ်ဆွန်နာရိုဟာ နေအိမ်တွင်းမှာပဲ နေထိုင်ရေး အစီအမံတွေနဲ့ နှာခေါင်းစည်းတပ်ရေး အစီအမံတွေကို ဆန့်ကျင်တာ၊ ထိရောက်မှုမရှိတဲ့ ဆေး၀ါးတွေကို အမွှမ်းတင်တာ၊ ကာကွယ်ဆေးကမ်းလှမ်းချက်တွေကို ပယ်ချတာနဲ့ အောက်ဆီဂျင် ပြတ်တောက်မှုအတွက် ကြိုတင်ပြင်ဆင်ဖို့ ပျက်ကွက်ခဲ့တာတို့ ရှိခဲ့တာကြောင့် ပြည်သူတွေကို အမျက်ဒေါသထွက်စေခဲ့ပါတယ်။
တကယ်လို့များ ဘော်လ်ဆွန်နာရို အစိုးရသာ နိုင်ငံမှာ ကာကွယ်ဆေးထိုးမှုဆိုင်ရာ ကြိုးပမ်းလုပ်ဆောင်မှုကို ခပ်စောစော စခဲ့မယ်ဆိုရင် လူ့အသက် ဘယ်လောက်များများကို ကယ်နိုင်ခဲ့မလဲ ဆိုတဲ့ အချက်က မေလ ၂၉ ရက် စုရုံးဆန္ဒပြပွဲတွေရဲ့ အဓိက ဆိုလိုရင်းတစ်ခု ဖြစ်ခဲ့ပါတယ်။
“ကျွန်တော်တို့ ဒီအစိုးရကို တားဆီးရပါလိမ့်မယ်၊ ရပ်တန်းက ရပ်ပါတော့ဆိုပြီး ကျွန်တော်တို့ ပြောရလိမ့်မယ်” လို့ စီးပွားရေးလုပ်ငန်းရှင်တစ်ဦးဖြစ်တဲ့ အိုမာ ဆယ်လ်ဗီးရားက အေအက်ဖ်ပီကို ပြောခဲ့ပါတယ်။
“သူဟာ လူသတ်သမားတစ်ယောက်ပါ၊ စိတ်ဝေဒနာရှင်တစ်ယောက်ပါ၊ သူ့မှာ ဘာ ခံစားချက် မရှိဘူး၊ ကျွန်တော်တို့လိုမျိုး သူ ခံစားမိမှာမဟုတ်ဘူး၊ သူ့ကြောင့် ဒီဘေးဒုက္ခက ပိုဆိုးနေတယ်ဆိုတာကို သူ သိနိုင်မှာ မဟုတ်ဘူး” လို့လည်း ဘော်လ်ဆွန်နာရိုနဲ့ပတ်သက်လို့ ဆယ်လ်ဗီးရားက ပြောသွားခဲ့ပါတယ်။
တစ်ချိန်တည်းမှာလည်းပဲ ဆန္ဒပြသူတွေဟာ အမေဇုန်သစ်တောပြုန်းတီးမှု၊ ဒေသခံတိုင်းရင်းသားပြည်သူတွေဆီကနေ မြေသိမ်းမှုတွေအတွက် ဘော်လ်ဆွန်နာရိုအပေါ် ဆန့်ကျင်ဆန္ဒပြခဲ့ကြသလို ဘော်လ်ဆွန်နာရိုဟာ အကြမ်းဖက်မှုနဲ့ လူမျိုးရေးခွဲခြားမှုကို အားပေးနေတယ်လို့လည်း ၎င်းတို့က ပြောခဲ့ကြပါတယ်။
