သမိုင်းရဲ့ မျက်နှာသာပေးမှုကို လက်မလွတ်အောင် ကြိုးပမ်းကြ

သမိုင်းရဲ့ မျက်နှာသာပေးမှုကို လက်မလွတ်အောင် ကြိုးပမ်းကြ

ယခုရက်ပိုင်းအတွင်း သတင်းလောက၊ နိုင်ငံရေး စိတ်ပါဝင်စားသူများနှင့် ပြည်သူအများစုက တိုင်းပြည်တာဝန်ရှိသူများ အချင်းချင်း ဆက်ဆံရေး အခြေအနေများကို စောင့်ကြည့်လေ့လာနေကြ၊ သရုပ်ခွဲနေကြ၊ မှတ်ချက်ပေးကြသည်မှာ စိတ်ဝင်စားဖို့ ကောင်းပါသည်။

အထူးသဖြင့် နှစ်ပေါင်း ရာစုနှစ်ဝက်ကျော် ပြိုကွဲလဲကျလုမတတ် ရှိနေခဲ့သည့် အမျိုးသား စည်းလုံးညီညွတ်မှု အခြေအနေကို မိမိတို့၏ မျက်မှောက်ကာလမှာပင် နိဂုံးချုပ်စေနိုင်သည့် အခါအ ခွင့်များ ရရှိလာနေသောကြောင့်ပင် ဖြစ်သည်။

တချိန်ကဆိုလျင် ပြည်တွင်းစစ်၊ အမျိုးသား စည်းလုံးညီညွတ်မှု ပြိုကွဲနေခြင်းကိစ္စကို အုပ်စိုးသူ အဆက်ဆက်က စကားလုံးအရပင် သုံးစွဲပြောဆိုရန် ခွင့်ပြုလေ့ မရှိခဲ့ချေ။ အုပ်စိုးသူ အဆက်ဆက်က ထားရှိခဲ့သည့်မူမှာ မိမိတို့တိုင်းပြည်တွင် ပြည်တွင်းစစ် မရှိသည့်သဘော၊ အမျိုးသားသွေးကွဲမှု မရှိ သည့် သဘောထား အခြေခံမူဖြင့်သာ ရပ်တည်လာခဲ့ကြ၏။ ပြည်တွင်းစစ် ရပ်စဲရေး စကားလုံးသည် ပင် တိုင်းပြည်တည်ငြိမ်မှုကို ထိခိုက်စေသော၊ ထိပ်တိုက်ရင်ဆိုင်မှုကို အားပေးသော စကားလုံးများအ ဖြစ် သတ်မှတ်ကာ အရေးယူ ပြစ်ဒဏ်ပေးသည်အထိ တင်းကြပ်ထားခဲ့သည်။

ယခုအခါ ကံအားလျော်စွာ သို့မဟုတ် ပြည်သူတို့၏ မလျှော့သော ဇွဲလုံ့လကြောင့် ပြည်တွင်း စစ် ရပ်စဲရေးနှင့် အမျိုးသားပြန်လည် ရင်ကြားစေ့ရေးကို မူအားဖြင့်ပင်လျင် အာဏာရ အစိုးရကိုယ် တိုင်က လက်ခံခြင်း ဝန်ခံဆောင်`ရွက်ခြင်းများ ရှိလာနေပြီ ဖြစ်သည်။ ထို့ကြောင့် ဝမ်းမြောက်စွာ ကြိုဆိုခဲ့ကြပြီး ဖြစ်သည်။

ယခုရက်ပိုင်းအတွင်း ရွေးကောက်ပွဲ အနိုင်ရပါတီဖြစ်သည့် အမျိုးသား ဒီမိုကရေစီ အဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်၏ အမျိုးသားရင်ကြားစေ့ရေး ကြိုးပမ်းဆောင်ရွက်မှုကို ဦးတည်သည့် စကားများ လှုပ်ရှားမှုများအပေါ် မူတည်ကာ ပြည်သူများ ဝမ်းသာ အားတက်ဖြစ်ကြရသည်မှာလည်း အမှန်ပင် ဖြစ်သည်။ ဥပမာ နောက်တက်မည့်  အစိုးရအဖွဲ့တွင် အမျိုးသား ရင်ကြားစေ့ရေးကို အထောက်အကူ ဖြစ်စေရန် အစိုးရအဖွဲ့အတွင်း အမျိုးသားဒီမိုကရေစီ အဖွဲ့ချုပ်မှ မဟုတ်သော တိုင်းရင်းသား ပါတီနှင့် အခြားပါတီမှ ပုဂ္ဂိုလ်များလည်း ပါဝင်ဖွဲ့စည်းမည်ဟူသော စကား၊ တဖန် လွှတ်တော် နာယကကြီး သူရဦးရွှေမန်းနှင့် တွေ့ဆုံဆွေးနွေးခြင်း၊ နိုင်ငံတော်သမ္မတကြီး၊ ကာကွယ်ရေး ဦးစီးချုပ်နှင့် တွေ့ဆုံစကားပြောခြင်း အပြုအမူများမှာ အမှန်တကယ်ပင် အမျိုးသား ရင်ကြားစေ့ရေးကို ဦးတည်သည့် အလုပ်များအဖြစ် လူတိုင်းလက်ခံသည့် အလုပ်များ ဖြစ်ပါသည်။

အမှန်တကယ်တော့လည်း အမျိုးသား ရင်ကြားစေ့ရေးကိစ္စမှာ လွယ်ကူပြီး အချိန်တိုအတွင်း အောင်မြင်အောင် ဆောင်ရွက်လို့ ရကောင်းသော ကိစ္စတော့ မဟုတ်ချေ။ နှစ်ဦးနှစ်ဖက်က  အမျိုးသား ရင်ကြာစေ့စေလိုသည့် ဆန္ဒ အမှန်တကယ် ရှိဖို့လိုအပ်ခြင်းနှင့် အပြန်အလှန် လေးစား အသိအမှတ် ပြုမှု အခြေခံရှိမှသာ အောင်မြင်နိုင်သည့် လုပ်ငန်းဖြစ်သည်။ အပြန်အလှန် လေးစား အပြန်အလှန် အသိအမှတ်ပြုသည့် အခြေခံအပေါ် ရပ်တည်မှသာ စစ်မှန်ပြီး ပြန်လည် မပြိုကွဲနိုင်သည့် အမျိုးသား ရင်ကြားစေ့ရေးကို ရနိုင်မည် ဖြစ်သည်။

မကြာမီ အစိုးရသစ် ဖွဲ့စည်းတော့မည်ဖြစ်သည်။ သက်ဆိုင်ရာ တာဝန်ရှိသူများ အကြိမ်ကြိမ် ကတိပေးထားသည့်အတိုင်း ငြိမ်းချမ်းပြီး စနစ်ကျသည့် အာဏာလွှဲပြောင်းမှု ရှိလာတော့မည်လည်း ဖြစ်သည်။ ထို့ပြင် မည်သည့် အချိန်အခါတုန်းကမျှ မမြင်ရ မကြားရခဲ့ဖူးသည့် အမျိုးသားရင်ကြားစေ့ ရေး ကြိုးပမ်းမှုများကလည်း တရားဝင် ရှိလာနေပြီ ဖြစ်သည်။

ထို့ကြောင့် သမိုင်းမျက်နှာသာပေးမှုအရ မိမိတို့ မျက်မှောက်ကာလမှာပင် မိမိတို့တိုင်းပြည် ဒီမိုကရေစီ နိုင်ငံတော်သစ် ပေါ်ထွန်းလာစေရေးနှင့် အမျိုးသားရင်ကြားစေ့ရေး ကြိုးပမ်းဆောင်ရွက်မှု လုပ်ငန်း စဉ်များ အောင်မြင်စေဖို့ဆိုလျင် မိမိတို့ ပြည်သူများကလည်း အကင်းပါးပါး သီးခံနိုင်စွမ်းနှင့် ညာဏ်အမြှော်အမြင်အပေါ် မူတည်ကာ ဝိုင်းဝန်းကြိုးပမ်းကြဖို့ အထူးလိုအပ်ကြောင်း တင်ပြလိုက်ရ ပါသည်။

Mizzima Weekly

Tags